1844 წლის 14 მარტს პარიზულ გაზეთ Le Siècle-ში ”სამი მუშკეტერის“ პირველი თავები გამოქვეყნდა. ასე გაიცნო სამყარომ ყველა დროის ყველაზე პოპულარული რომანი! მუშკეტერობაზე მეოცნებე ახალგაზრდა დ’არტანიანი საფრანგეთის ერთ-ერთი პროვინციიდან დედაქალაქში ჩადის და ათოსს, პორთოსსა და არამისს უმეგობრდება. მათ თავგადასავალს ”სამი მუშკეტერი“ ვერ იტევს, ის გრძელდება მომდევნო რომანში - ”ოცი წლის შემდეგ“ - და მესამე, მოცულობით ყველაზე დიდ წიგნში - ”ვიკონტი დე ბრაჟელონი, ანუ ათი წლის შემდეგ“ - დაგვირგვინდება. ალექსანდრე დიუმა (უფროსი) - ყველა დროის საუკეთესო მთხრობელი - 1802 წლის 24 ივლისს დაიბადა და დღემდე მსოფლიოში ერთ-ერთ ყველაზე პოპულარულ მწერლად რჩება. შემოქმედებითი კარიერა დაიწყო პიესებით, რომლებიც გამოქვეყნებისთანავე იდგმებოდა საფრანგეთის სცენებზე. არანაკლებ წარმატებული იყო დიუმა, როგორც პუბლიცისტი, თუმცა სახელი და დიდება სათავგადასავლო რომანებმა მოუტანა. ”გრაფი მონტე-კრისტო“, ”სამი მუშკეტერი“, ”ოცი წლის შემდეგ“, ”ვიკონტი დე ბრაჟელონი, ანუ ათი წლის შემდეგ“ მრავალ ენაზეა თარგმნილი და დაახლოებით ორასჯერაა ეკრანიზებული. დიუმას მიერ გამოქვეყნებული ტექსტების საერთო მოცულობა კი 100 000 გვერდს აღემატება.