თუ ლიტერატურაში საინტერესო ამბებს ეძებთ და, იმავდროულად, თხრობის სტილსა და ენობრივ სრულყოფილებასაც დიდ ყურადღებას აქცევთ; თუ სიამოვნებას იღებთ მახვილგონივრული დიალოგებითა და მოსწრებული პასუხებით; თუ გაინტერესებთ გამორჩეული სამწერლობო სტილი და თან კითხვის პროცესით ტკბობაც მოგენატრათ, მაშინ ზაზა ბიბილაშვილის „ნახევარზღაპარა“ თქვენთვისაა! ავტორს მკითხველი რეალობიდან ფანტასმაგორიამდე ოსტატურად გადაჰყავს პაროდიის, ირონიისა და იუმორის ხიდებით, იქ კი ზოგადსაკაცობრიო თემების პირისპირ აღმოჩენილს დააფიქრებს ისეთ ფუნდამენტურ საკითხებზე, როგორიცაა ბედი და ბედისწერა, რეალობის სიზმრისეული ბუნება, ღვთიური განგებულება, ამსოფლიური ამაოება და სამყაროს კანონზომიერება. „წიგნია ჩვენი მოკავშირე... წიგნი, რომელიც ადამიანს აკეთილშობილებს, აჰუმანურებს, სინდის-ნამუსს გამოასხამს“. „თუკი სხვანაირი წიგნი საერთოდ არსებობს, მაშინ სწორედ ადამიანის გამაკეთილშობილებელი წიგნია ნამდვილი საუნჯე, ეშმაკის საჩუქარი, ქაჯების ბრილიანტი!"