ანა მარგველაშვილის „წერილები მეფეს“ დოკუმენტური პროზაა, სადაც ავტორი თელავის ყოველდღიურობის თუ უხალესი ისტორიის შესახებ უყვება ქართლ-კახეთის მეფე − ერეკლე მეორეს: „... უკვე ათ წელზე მეტია აქ დავდივარ, ხან ცოტა და ხანაც დიდი ხნით. უკვე ათი წელია ნელ-ნელა ვეცნობი თელავსა და მის შემოგარენს. ამბებს ვაგროვებ, ვაკვირდები, რაღაც მახარებს, რაღაც მაფიქრებს, ანდაც მადარდებს. ჰოდა, შემიძლია ძველიც გავიხსენო, დღევანდელიც გაგიზიარო და ამ წლების ამბები იმის დასტურადაც მოგიყვე, რომ ავად თუ კარგად, გრძელდება ცხოვრება და თელავიც ისევ ცდილობს გაუმკლავდეს დროების მოტანილ დიდ-პატარა პრობლემებს, ქარებს და ქარბუქებს“ − ვკითხულობთ წიგნში. „წერილები მეფეს“ არის წიგნი თელავის და მისი შემოგარენის შესახებ, დანახული და აღქმული არა თელაველის, არამედ გარეშე პირის მიერ. პირის, რომელიც წლების მანძილზე მუშაობდა და ბოლოს ცხოვრობდა კიდეც თელავში. წიგნი გაფორმებულია ავტორის ფოტოებითა და ნახატებით. რედაქტორი − შოთა იათაშვილი.