„უკანასკნელ ამოსუნთქვამდე“ - ეს არის ფსიქოლოგიური რომანი ერთი ადამიანის ცხოვრებაზე, ურთიერთობებზე, სიძულვილსა და სიყვარულზე, შურისძიებაზე, მეგობრობაზე და რაც მთავარია, პატიებაზე. მთავარი გმირი და მთხრობელი გახლავთ ალექსანდრე ალექსიძე, გამომძიებელი, რომელიც მიუხედავად თავისი პროფესიული წარმატებისა, ადგილს ვერ პოულობს წუთისოფელში, რაც ერთი მხრივ, გულზე დაღად დასმული წარსულის წარუშლელი ზეგავლენაა. დანაშაულის გრძნობისგან გაქცევა საკუთარი თავის დაკარგვამდე, უღიმღამო, უსიამოვნო სტაბილურობამდე მიიყვანს და მცდარ მიზანს დაუსახავს. და აი, ერთხელაც ყოვლისმომცველი გარდატეხა ხდება. ერთი არასწორი, შემთხვევითი ნაბიჯი უსიამო სტაბილურობას სასოწარკვეთად აქცევს და ალექსანდრე ფსკერამდე ეცემა. შემდეგ იწყება ქაოსი, არეულობა, რევოლუცია, სრული გარდაქმნა და საკუთარი თავის ახლიდან აღმოჩენის მცდელობები... ეს არის წიგნი ადამიანზე, რომელიც არ ეკუთვნის ამ სამყაროს.