ყველასათვის ცნობილი მწერალი, აკა მორჩილაძე, იგივე გიო ახვლედიანი 1995 წლიდან 2009 წლამდე მუშაობდა სპორტულ გაზეთ "სარბიელში" ე.წ. მესვეტედ და სხვადასხვა ფსევდონიმით აქვეყნებდა წერილებს სპორტის თითქმის ყველა სახეობის, უმეტესად კი ფეხბურთის შესახებ. ამ 14 წლის განმავლობაში ათასობით სტატია დაიწერა, რომელთა წიგნად გამოცემის იდეაც "სარბიელის" რედაქტორს, ზურაბ მეძველიას მოუვიდა აზრად. სწორედ მან შეკრიბა ძველი წერილები, გადაარჩია და ეს უზარმაზარი მასალა 10 ტომზე დაიყვანა. ახლა ამ ათტომეულის პირველი წიგნია (1995-1997 წ.წ) მკითხველის წინაშე და დიდ სიამოვნებას ჰპორდება ფეხბურთის, ზოგადად სპორტის და უბრალოდ კარგი წიგნი მოყვარულებს.