რომანი - „მუჭანახევარას თავგადასავალი“ საინტერესო უნდა იყოს მკითხველისთვის თუნდაც იმით, რომ ამჯერად უკვე დაუფარავად ვეცნობით მთავარი გმირის (აბესალომ-კალენიკე) არა მარტო აწმყოს, არამედ მის წარსულსაც და ასე ეხდება ფარდა იმ საიდუმლოს, რამაც მუჭანახევარი მარილის მოსატანი გზა ასეთი ფათერაკიანი გაუხადა მას. ეს ნაწარმოები ღირებულია იმითაც, რომ ავტორი ბევრი ქართული ხალხური ზღაპრის ჭეშმარიტ ვერსიას გვაცნობს, რომელიც მან უშუალოდ პირველწყაროსგან - მეზღაპრე-მანათობელისგან მიიღო. არავის გვეპარება ეჭვი, რომ დრო ყველაფერს ცვლის და დროთა განმავლობაში აქ მოთხრობილმა ზღაპრებმაც იცვალეს სახე. თითქმის ყოველი მათგანი დაიშალა უფრო პატარა ამბებად, ზოგმა აზრიც იცვალა, ზოგში კი უარყოფითმა გმირმა დადებითი ელფერი შეიძინა და... პირიქით - ასეთი სახით შემოგვენახენ... ასე რომ შესაძლოა ეს რომანი ქართული ფოლკლორის მკვლევარებისთვისაც საინტერესო გახდეს.