მოქმედება მიმდინარეობს თბილისსა და პარიზში, 2018-2021 წლებში. ირაკლი და ვაჟა ფრანგ კინემატოგრაფებთან ერთად ფილმს პარიზში იღებენ, სადაც ირაკლის შანსი აქვს, ორი ოცნება აიხდინოს - გაიცნოს საყვარელი რეჟისორი და მოძებნოს დიდი ხნის უნახავი შვილი. საფრანგეთში განვითარებული მოვლენები ირაკლისა და ბარბარეს ურთიერთობას მთლიანად ცვლის. ირაკლის გადაწყვეტილება, სამეცნიერო ექსპერიმენტში საიდუმლოდ მიიღოს მონაწილეობა, განსაზღვრავს მის შემდგომ ცხოვრებას. იწყება პანდემია, რაც სირთულეებს უქმნის პიესის გმირებს. პიესა ეხება ადამიანური ურთიერთობების სირთულეებს, ხელოვანის როლს საზოგადოებაში და ა.შ. პიესა სავსეა მოულოდნელობით და ზოგჯერ რთულია გარკვევა, სად გადის ზღვარი ადამიანის წარმოსახვასა და რეალობას შორის. პარალელურად, ერთი ოჯახის ისტორიის ფონზე, პიესაში მოცემულია 1918-21 წლის და 1990-იანების საქართველოს სურათები და ადამიანების ბედი. პიესა სრულდება 2021 წლის 5 ივლისის თბილისის ცნობილი მოვლენების ფონზე, როდესაც პიესის პერსონაჟებს საფრთხე ემუქრებათ ანტიდასავლურად განწყობილი ჯგუფების მხრიდან.