ავტორისგან: "როცა მზე ჩადის" პროზაული კრებულია და შერეული ჟანრის ხუთი მოთხრობისგან შედგება. ამ ხუთი მოთხრობიდან სამი: "როცა მზე ჩადის", "ოდისეა ანუ ძველი სახლი არსენალზე" და "Memorabilia" "ნინოს ცხოვრების" (2021) ერთგვარი ეპილოგია, "ნინოს ცხოვრების" მესამე ნაწილის ერთგვარი გაგრძელება, ქრონოლოგიურადაც და ჟანრულადაც, თუმცა ისინი, სამივე, ამავე დროს, სრულიად დამოუკიდებელი ნაწარმოებებია. კიდევ ერთი მოთხრობა, "მე ბრალს ვდებ", 2020-2021 წლების პანდემიის დროს საქართველოს ხელისუფლებისა და მისი ჯანდაცვის სისტემის მოქმედებათა მკაცრ მხილებას წარმოადგენს. რაც შეეხება კრებულის მეხუთე მოთხრობას, "უკრაინა - ფრაგმენტები დღიურიდან", ის, დღიურების ფორმით წარმოდგენილი, თემატურადაც და ჟანრულადაც სრულიად განსხვავებულია. წიგნის გარეკანზე გამოყენებულია კლოდ მონეს ნახატი "მზის ჩასვლა სენაზე ლავაკურთან, ზამთრის ეფექტი" (1880). "როცა მზე ჩადის" დედაჩემის ხსოვნას ეძღვნება.