მია-მამაჩემი გემის კაპიტანია "MIKE INDIA ALPHA, MIKE INDIA ALPHA", - ჯიუტად იმეორებს მია რადიო ფონეტიკური ანბანის მიხედვით დაშიფრულ საკუთარ სახელს, რომელიც მამამ ასწავლა, გოგონასთვის კი ძალიან მიმზიდველი და საინტერესო აღმოჩნდა. ყველაზე ხშირად სწორედ „ მეზღვაურობანას" თამაშობს და აბა, როგორ გააგონებს ხმას ყველაზე უცნაურ პორტს მსოფლიოში, სადაც ვარდისფერი დათუნიები, გოჭი პეპა და ფუმფულა მაიმუნი ვილი მუშაობენ. მია ყოველთვის გემის კაპიტანია და პირველ თანაშემწედ თავისი საყვარელი თოჯინა, ელზა, ჰყავს. გემი, მის წარმოსახვაში, ყველაზე ჯადოსნური ადგილია სამყაროში. უამრავი ფერადი ღილაკი, შტურვალი, რადარები, სქემები, მონიტორები, ნავიგაციური რუკები... მოკლედ, ყველაფერი, რაც პატარა გოგოს გასართობად სჭირდება. მიას ლოგინი ხან ხის დიდი, ორანძიანი, იალქნებიანი გემია, ხანაც - ყველაზე თანამედროვე ხომალდი, თვითონ კი ყოველთვის „ ლოგინის კაპიტნის" როლი აქვს. ჰო, სწორედ ასე ამბობს ხოლმე - ამ ლოგინის კაპიტანი მე ვარო.
მიას კიდევ ორი საყვარელი თოჯინა ჰყავს: ერთი - ძალიან ძველი, დედას ნაქონი, რომელიც სულ შემთხვევით სარდაფში იპოვა, როდესაც ბებოს მურაბებისა და კომპოტების დალაგებაში ეხმარებოდა. შეეცოდა, აქ ხომ არ დავტოვებო, ჯერ კიდევ ასეთი პატარაა და ალბათ, ისედაც შეშინებულია, ამდენი ხანი რომ სიბნელეში მარტო ცხოვრობსო. თოჯინა სახლში წამოიყვანა, დაბანა, გაასუფთავა და დედას შეკერილი უამრავი ფერად-ფერადი კაბიდან, რომელსაც, როგორც წესი, მიას კაბების ნარჩენი ქსოვილებისგან კერავდნენ, ახალი, იისფერყვავილებიანი კაბა მოარგო, სახელიც ისეთი შეურჩია, კაბას რომ მოუხდესო - ლეა. მეორე კი, ძალიან გაპრანჭული თოჯინა, რომელიც სულ რამდენიმე თვეა მასთან ცხოვრობს, სტუმრად ჩამოსულმა ბებომ აჩუქა. ამ თოჯინას მიამ ჰოლი დაარქვა, მულტფილმის საყვარელი გმირის პატივსაცემად. რა თამაშს აღარიგონებდა, თუმცა „ მეზღვაურობანას" შემდეგ ყველაზე მეტად მაინც „ სახლობანას" თამაში მოსწონდა. თვითონ, რა თქმა უნდა, ყოველთვის დედა იყო, თოჯინები კი - მისი შვილები. აჭმევდა, ამეცადინებდა, ასეირნებდა, აძინებდა და ბევრს, ძალიან ბევრს ესაუბრებოდა. ყველაზე ხშირად დასმულ შეკითხვაზე - „ აბა, ბავშვებო, დღეს სად წავიდეთ - პარკში თუ გემების სანახავად?"- თოჯინები, რა თქმა უნდა, ყოველთვის ერთხმად (მიას ოდნავ დაწვრილებული ხმით) პასუხობდნენ: „ გემების სანახავად, გემების სანახავად". აქედან კი ისევ იწყებოდა მოგზაურობა ხომალდების გამოგონილ სამყაროში.
ალბათ, უკვე მიხვდი, რამდენად გატაცებული იყო პატარა მია გემებით. რატომ მაინცდამაინც გემები? მიზეზს ახლავე მოგიყვები.
მიას დედა ჟურნალისტია და პატარა ბეჭდური გამოცემისთვის ამზადებს სტატიებს. ყველაზე მეტ უცნაურ და საინტერესო ამბავს გოგონა სწორედ მისგან იგებს ხოლმე, შემდეგ კი ნიშნისმოგებით სხვებს უზიარებს, დარწმუნებული, რომ მის ასაკში ეს ყველაფერი ჯერ კიდევ არავინ იცის. მაგალითად, ის, რომ კატებს თავიანთი ენა და საურთიერთოდ თექვსმეტამდე „ კატური სიტყვაც" კი აქვთ; ან ის, რომ სხვადასხვა ზედაპირიდან ბავშვების თითის ანაბეჭდები უფრო მალე ქრება, ვიდრე უფროსებისა.
მამა კი, არც მეტი, არც ნაკლები, მეზღვაური ჰყავს. სანამ ძალიან პატარა იყო, გოგონას უჭირდა, გაეგო, სად მიემგზავრებოდა მამა დიდი ჩემოდნებით რამდენიმე თვით, რაც მას საუკუნედ ეჩვენებოდა; იგი ისევ ბრუნდებოდა, თუმცა მონატრებულ მამასთან ერთად გატარებული დრო ძალიან სწრაფად გადიოდა. შემდეგ ისევ წასვლის დრო დგებოდა და ასე, დაუსრულებლად …
მამა 30 წლის უკვე გემის კაპიტანი იყო. როგორც ამბობენ, ყველაზე ახალგაზრდა კაპიტანი ქვეყანაში. მართალია, მაშინ, როდესაც კაპიტანი გახდა, მია ჯერ კიდევ დაბადებულიც არ იყო, თუმცა, რაც გაიზარდა და ჭკუა მოეკითხება, მამის მიღწევებით სულ ამაყობს. მის გარშემო არავის ჰყავს მამა მეზღვაური და თანაც - კაპიტანი. ეს უბრალო ამბავი ხომ არ არის?! ამიტომაც ის ამ ამბით ყოველთვის და ყველგან თავს იწონებს. როდესაც ბავშვები იგებენ, რომ მამამისი მეზღვაურია, კითხვებით არ ასვენებენ გოგონას, აინტერესებთ მისი თავგადასავლების, მოგზაურობების შესახებ, მაგრამ მიამ ამის შესახებ ბევრი არაფერი იცის, მიუხედავად იმისა, რომ გამალებით უსმენს ხოლმე გემიდან ახალდაბრუნებულ მამას. იცის, რომ მან ამჯერად აფრიკაში ან თუნდაც სინგაპურში იმოგზაურა, დანარჩენი დიდად არც აინტერესებს. ხიდურა, ნავთობი, დრეიფი, ბუნკერი, დოკი - ის, რაზეც მამა ხშირად საუბრობს, მისთვის უბრალოდ უცხო სიტყვების ერთიანობაა. აი, ღუზა კი იცის და ძალიანაც მოსწონს. ამბობს - როცა გავიზრდები, ტატუ უნდა გავიკეთო, ნარინჯისფერი ღუზაო. ეს თემაც მარტო იმიტომ ხიბლავს, რომ მამას ბევრი და ლამაზი ტატუ აქვს. ფეხზე დიდი და უცნაური რამ ახატია. ეს სიზმრების დამჭერიაო, - ამბობს (Dream Catcher), მია ვერ ხვდება, როგორ შეიძლება დაიჭიროს ამ მრგვალმა რაღაცამ სიზმარი, მიუხედავად იმისა, რომ თევზების საჭერ ბადეს წააგავს, მაგრამ ამას განა
ჩუქება
