ლიტერატურული ალუზიები სი ძინპინის გამოსვლებსა და ნაშრომებში
წიგნი მეორე
გაზეთ „ჟენმინ ჟიბაო”-ს მიმოხილვებისა და რეცენზიების განყოფილება
ქვეყანა მაშინ ყვავის, როდესაც პატივს სცემენ მასწავლებლებს და სათანადოდ აფასებენ ნიჭიერ ადამიანებს. და თუკი მასწავლებლებს პატივს სცემენ და ნიჭიერ ადამიანებს აფასებენ, ქვეყანაში სათანადოდ მოქმედებს კანონი და წესრიგი მყარდება.
ქვეყნის სწორად მართვა ნიშნავს, საკუთარ ხალხს მოეპყრო ისე, როგორც მშობელი მოეპყრობა უსაყვარლეს შვილს, როგორც უფროსი ძმა – უსაყვარლეს უმცროს ძმას. თუ გაიგონებ, რომ ხალხი შიმშილითა და სიცივით იტანჯება, უნდა თანაუგრძნო; თუ დაინახავ, ხალხი მძიმე შრომით იტანჯება, უნდა გამოიჩინო გულმოწყალება.
უნდა დაიკავო ღირსეული ადგილი ცისქვეშეთში, იარო დიადი გზით ცისქვეშეთში.
ცა და მიწა უნდა აავსო სულით, განუსაზღვრო ხალხს ცხოვრებისეული დანიშნულება, გადასცე გარდასულ დროის ბრძენთა ჭეშმარიტი სწავლება, ჰპოვო მარადიული სიმშვიდე ცისქვეშეთში.
გამომცემლობა „ჟენმინ ჟიბაო ჩუბანშე”
„მომავლის აღმოჩენას შეძლებს მხოლოდ ის, ვინც არ დაივიწყებს ისტორიას; ახლის შექმნა ძალუძს მხოლოდ მას, ვინც იმემკვიდრებს წარსულს”. ჩკპ გენერალური მდივანი, სი ძინპინი თავის გამოსვლებსა და ციტატებში ოსტატურად იყენებს უძველეს ბრძნულ გამონათქვამებს, ციტატების საშუალებით ავლენს წარსულისა თუ მიმდინარე მოვლენების ბუნებას, ცოცხალი და ხატოვანი ენით გადმოსცემს ღრმა აზრს. სწორედ ამიტომ, უამრავ ადამიანს იზიდავს მისი გამოსვლები და სტატიები, საიდანაც აზროვნების უჩვეულო ძალა და უმაღლესი დონის კულტურული თვითშეგნება გამოსჭვივის. ჩვენ ვიტვირთეთ წინამდებარე წიგნის, „ლიტერატურული ალუზიები სი ძინპინის გამოსვლებსა და ნაშრომებში” გამოცემა, რათა მკითხველმა უკეთ შეიცნოს ქვეყნის მმართველობის გზა და უძველეს გამოთქმებსა თუ ისტორიულ სიუჟეტებში შეფარული კულტურული კონტექსტი. წიგნი, 2015 წლის თებერვალში გამოქვეყნების შემდეგ, 2 მილიონ ეგზემპლარად გამოიცა და უმთავრეს სამაგიდო წიგნად რჩება სი ძინპინის იდეების გასაცნობად ჩინური სოციალიზმის ახალი ეპოქის შესახებ.
გასული წლების განმავლობაში ჩკპ გენერალურმა მდივანმა, სი ძინპინმა მთელ რიგ მნიშვნელოვან გამოსვლებსა თუ ნაშრომებში არაერთი ცნობილი კლასიკური გამონათქვამი გამოიყენა. მრავალრიცხოვანი მკითხველის დაუღალავი თხოვნის პასუხად, გამომცემლობა „ჟენმინ ჟიბაო”-მ მეორე წიგნი „ლიტერატურული ალუზიები სი ძინპინის გამოსვლებსა და ნაშრომებში” გამოაქვეყნა. ახალ წიგნში შენარჩუნებულია წინა წიგნის სტრუქტურა და შესულია 148 რჩეული, ყველაზე ხშირად მოყვანილი კლასიკური გამონათქვამი, რომლებიც გამოირჩევა ღრმა ზეგავლენის უნარით და სი ძინპინის იდეებს მაქსიმალური სიზუსტითა და სისრულით გადმოსცემს. თითოეულ ციტატას ახლავს განმარტება, სადაც ახსნილია გამონათქვამის უმთავრესი არსი და თანმდევი სემანტიკური კონტექსტი.
ჩკპ XIX ყრილობის მოხსენებაში აღნიშნულია: „მაღალი კულტურული თვითშეგნების გარეშე შეუძლებელია კულტურის აღმასვლა და გაფურჩქნა, ეს კი ნიშნავს, რომ შეუძლებელია ჩინელი ერის აღორძინება.” ჩინური სოციალიზმი ახალ ეპოქაში შედის. ყველა რანგის პარტიული მუშაკისთვის ესაა მითითება იმისა, რომ რეფორმების ყოვლისმომცველი გაღრმავება საჭიროებს წარსულის გაკვეთილებზე დაფუძნებული მომავლის გააზრებას; რომ დაბრკოლებებისა და სირთულეების დაძლევა ისტორიის ცოდნისგან განუყოფელია; რომ სახელმწიფოს მართვა და ძალაუფლების გამოყენება შეუძლებელია იდეალებისადმი უსაზღვრო ერთგულებისა და თავდადების გარეშე. ავტორებმა სისტემაში მოიყვანეს სი ძინპინის მიერ გამოყენებული ციტატები, დაურთეს განმარტებები, რითაც წვლილი შეიტანეს დიდებული ტრადიციული ჩინური კულტურული მემკვიდრეობის განმტკიცებისა და ხალხის ფართო მასების პარტიის გენერალური მდივნისთვის მხარის სწორების საქმეში.
წიგნზე „ლიტერატურული ალუზიები სი ძინპინის გამოსვლებსა და ნაშრომები” მუშაობისას ვიხელმძღვანელეთ უამრავი ლიტერატურული წყაროთი თუ კომპეტენტური განსჯებით, რომელთა ავტორების მიმართაც გამოვხატავთ უსაზღვრო მადლიერებას. ვაცნობიერებთ რა ჩვენს შეზღუდულ შესაძლებლობებს, წიგნში გარდაუვალია გარკვეული უზუსტობებისა თუ ნაკლოვანებების არსებობა, რის გამოც წინასწარ ვუხდით მადლობას ყველა მკითხველს კრიტიკული შენიშვნებისა თუ შესწორებისთვის.
ავტორთა კოლექტივი
აპრილი, 2018 წ.