21-ე საუკუნეს ხშირად უწოდებენ ღირებულებების გადაფასების ეპოქას. თუმცა სწორედ ამ საუკუნემ წარმოაჩინა, რამდენად მოგვნატრებია ნამდვილი გრძნობები და ადამიანური ურთიერთობები - ყოველგვარი თამაშისა და სიყალბის გარეშე. იქამდეც კი მივსულვართ, მოგვნატრებია ნამდვილი სიყვარულის სურნელის შეგრძნება და მისი გათავისება. მოგვნატრებია სიტკბო დედაშვილური ურთიერთობისა, მამების ხატება და მათი უპირობო პატივისცემა, ბებოებისა და ბაბუების თბილი კერის სურნელი და მათი მოფერების სიტკბო. მოგვნატრებია ცხოვრება გმირებისა და მათი წარმოჩენა საჯარო ასპარეზზე. ამ ნაწარმოებში მოთხრობილია ერთ დიდ ტრადიციულ ოჯახზე, რომელიც ორი ეპოქის მიჯნაზე ცხოვრობს და ცდილობს ღირსებით, სიყვარულითა და პატიოსნებით ისე იაროს ცხოვრებისაგან ბოძებულ ბეწვის ხიდზე, ირგვლივ სიკეთეც თესოს და ვალიც არავისა დარჩეს. "სურნელი სიყვარულისა" - წიგნი, რომლის წაკითხვაც უზომო სიამოვნებას მოგანიჭებთ, სწორედ ამ ღირებულებების გასახსენებლად გიწვევთ. ამბავი მეოცნებე ბიჭზე, რომელიც ცხოვრების სირთულეებმა გმირად აქცია და რომლის ცხოვრებაც მაგალითად შეიძლება იქცეს თაობებისთვის. ბოლოს კი, საბოლოო სულის სიმშვიდე მაინც მშობლიურ ფესვებში ჰპოვა.