მზეს ველოდები მეც დავიჯერებ
ვიცი, წაიღებს იმ გაზაფხულს ეს შემოდგომა,
შემომაძარცვავს სულში წარსულს,
დაზამთრებამდე ფოთლადქცეულ
ჩემს ყველა გრძნობას,
გააყვითლებს და გამოაქრობს.
ვიცი, არ მეტყვის მომავალი - კვლავ გათენებას,
ვიცი, ზამთარი დაამიწებს ყველა შეგრძნებას.
წვიმა კი ისევ შეარბილებს ამ ტონს, ამ მიწას,
და ბელტად ქცეულ სულსაც მოალბობს.
შემოდგომასაც ხომ სჭირდება გამოგლოვება...
ოდესმე, რაზეც გვიფიქრია, სიკვდილის პირას,
იყო წარსული და სიყვარული.
მაცადეთ,
იქნებ მეც გავერკვე ამ ჩემს გრძნობებში.
აიშოლტება გაზაფხულზე მოხრილი ტოტი
და დაეხსნება ფიქრებს მზაკვრულს -
მეც დავიჯერებ,
რომ სიკვდილამდე არ ღირს
სიკვდილი.
იქნება ისევ მოვიდეს წვიმა
იქნება ისევ მოვიდეს წვიმა,
ჩამოიკენკოს ციდან მარცვლები,
ისეთი წვრილი, ისეთი წმინდა,
რომ ჩრდილად ჩანდეს ჩემი ფიქრები.
და იქნებ ისევ გამოჩნდეს ცაზე,
ანგელოზების ნაფეხურები,
იქნება დარდიც ჩამომრეცხოს,
და ძალაც მეყოს გაზაფხულამდე.
შეიძლებოდა ვყოფილიყავი ნებისმიერი
ნებისმიერი შეიძლება ვყოფილიყავი,
წინა კორპუსში ქალი რომ ტირის...
ისიც, ცომს რომ ზელს მის მეზობლად,
ანდა ის ბავშვი,
ახლა მარტო ბურთს რომ თამაშობს,
ანდა ის კაცი, ქუჩაში რომ ურნას გარს უვლის.
ნებისმიერი გზა შემეძლო ამერჩია, -
მარილი მადლზე არ მომეყარა,
ანდა სიკეთე ჩამემარხა ღრმად სულის სულში,
არ გავყოლოდი მთაში ბილიკებს,
წვიმაში ქოლგა არ გამეშალა,
ჩალუმპულ თმებში დამებნია იასამნები.
ტალახისფერი გამხდარიყო თითქოს სამყარო,
ნებისმიერი შეიძლება ვყოფილიყავი,
რომ გამეწყვიტა ფიქრის ტალღა,
დაწრეტილიყო სისხლისაგან ძარღვი
და გული.
ისე წახვედი
ჩვენ ვართ ცალ-ცალკე - ერთი მთლიანი,
იმ ამბებს, მხოლოდ ჩვენ რომ გვესმოდა,
მშვიდად ყვებოდნენ ჩვენი მზერები.
ჩვენ დავდიოდით სხვების სახლებში,
და იმ სახლებში ხალხი ყვებოდა
სხვა ისტორიებს, ჩვენსას კი არა.
ჩვენ კი, ჩვენ გრძნობას ვაკოწიწებდით.
და ვინახავდით ხელისგულებში,
შემთხვევით რომ არ გაგვბნეოდა,
მაგრად ვუჭერდით ერთმანეთს ხელებს.
ქუჩებში, მთებში, ქარში, ავდარში,
და ბრბოს წინაშე, ეს ორი ხელი,
იქ, სადაც ორი გულიც ფეთქავდა,
ერთ მუშტად იყო მუდამ შეკრული.
ვმოგზაურობდით წვიმაში, ფიქრში,
სიზმარშიც ხშირად ვმოგზაურობდით...
და ვგრძნობდით დღეებს, საათებს, წუთებს...
უერთმანეთო წამებსაც ვგრძნობდით...
ჩვენ ვსაუბრობდით ხეებთან,
მაშინ, როცა იცვავდნენ ყვითელ ხალათებს
მაშინ საეჭვოდ დუმდნენ ბუჩქები,
და მეგობრებიც საეჭვოდ დუმდნენ.
დუმდნენ ფიქრებიც, სხვებივით დუმდნენ.
გვჭორავდნენ მზერით სხვების ქუჩები,
გვჭორავდნენ
საკუთარ დარდებს იკლავდნენ ამით.
შემოგვაცვდა ფეხსაცმელები,
შემოგვეძარცვა ტანზე სამოსიც,
და დაიღალნენ ქუჩებიც ჩვენით,
ჩვენც დაგვეღალა ფიქრი უმზეო,
და ნაბიჯები ისე შენელდა,
ხელი გავუშვით ერთმანეთს მზერით...
ვერ გადავურჩით ამ ზამთრის მოსვლას,
ვეღარ გაუძლო დაღლილმა სულმაც,
ისე წახვედი, რომ გაზაფხულზე...
გაზაფხულზე სიტყვაც არ გითქვამს.
* * *
შემთხვევითობა ღმერთის ხმაა.
ის, ხმა რომელიც სულ ჩამესმის,
სტრიქონებს შორის წასაკითხი წიგნები
ანდა სულაც წერილები,
კარის ღრიჭოში დატოვილი...
ღამით ნანახი ამოუცნობი სიზმრები
და გასაშიფრი ხელისგულები...
ყავის ჭიქაში დალექილი ვარაუდები,
შემთხვევით ნათქვამი სიტყვები
და შემთხვევით ნანახი ფერები...
ღმერთის ხმაა, რომელიც არ გვესმის.
და არ გვესმის...
როცა აღარ მაქვს დრო დალოდების
მიყვარს ბალახი,
რომელზეც ცვარი არის წამოსკუპული...
ირეკლავს ცისფერს,
ან ნამისფერს, ანდაც სამყაროს...
მიყვარს საღამო
მზის ჩასვლას რომ გამოიმეტებს.
არ ვარ მდიდარი,
დავდივარ მთებში,
არ ვარ ღარიბი,
და მივათრევ სითბოს.
დამესხა დარდი,
თითქოს უნდა თავით ჩამმარხოს,
და წუთისოფლის სიყვარულმა
უნდა დამაღრჩოს...
და რატომ იწვის ნაწერები ვერ გამიგია,
ან რატომ ტყდება ყველა სიტყვა
რომელსაც ვისმენ.
რატომ მოდიან
ხელუხლებელ სიყვარულისთვის,
რად გადმოდიან იმ ზღვარს მიღმა,
რომელიც არ ჩანს...
მაგრამ არსებობს,
დაღლილი წვიმაც
ზუსტად ასე ჩამოისვენებს,
ნაწვიმარ ბალახს
თუ აუვა ხასხასის ფერი.
გადმოვა ცვარი
და მზის სხივებს დაელოდება,
და ზუსტად ისე,
ზუსტად ისე, როგორც მე ველი...
როცა აღარ მაქვს დრო დალოდების...
დავბოდიალობ სულიდან სულში
თუკი სამყარო ისე დადუმდა,
რომ აღარ ისმის ფოთლების რხევა.
თუკი წვიმამაც გადამივიწყა,
და აღარ ვიცი ჩემს თავს რა ხდება.
გადმოიქროლებს ნიავი ისევ,
შემომალეწავს ფიქრებს ავყიას. ?
თუკი წარსული ისევ გზად მხვდება,
თუკი არ მომირჩა ძველი იარა,
თუკი სამყარო ისე გახელდა,
და სულზე ისევ გადამიარა.
რომ სიყვარულით ვერ დავიბადე,
მაშინ სიცოცხლეს გროშის ფასი აქვს.
თუკი ქუჩაში დავდივარ მარტო,
თუკი არ ვიცი, სად მიმელიან,
თუკი არ ვიცი სად შევეფარო,
თუკი სიბნელის კვლავ მეშინია.
თუკი სიტყვებიც ვეღარ მშველიან.
დაუამებელს ვირჩენ