წინათქმა მის უკეთილშობილებას[1], თომას ერლს, ფემბროქის გრაფს[2] და ა.შ., ლეკვერთხის ორდენის უკეთილშობილეს რაინდსა და მისი უდიდებულესობის მაღალპატივცემული საიდუმლო საბჭოს წევრს
მილორდ!
შესაძლოა გაგიკვირდეთ, რომ უცნობი პიროვნება, რომელსაც არ რგებია პატივი, ყოფილიყო ცნობილი თქვენი ბრწყინვალებისთვის, ბედავს ამ გზით მოგმართოთ. მაგრამ ის, რომ ადამიანი, რომელმაც რაღაც სასარგებლო დაწერა სამყაროში ცოდნისა და რელიგიის გავრცელების მიზნით, თქვენს ბრწყინვალებას ირჩევს თავის მფარველად, არავის მოეჩვენება უცნაურად, ვისთვისაც სრულიად უცხო არ არის ეკლესიისა და განათლების თანამედროვე მდგომარეობა, შესაბამისად კი, ისიც, თუ რაოდენ მხარდაჭერასა და მშვენებას წარმოადგენს თქვენი პირონება ორივესათვის. მიუხედავად ამისა, ვერაფერი მიბიძგებდა, თქვენთვის მომეძღვნა ჩემს უსუსურ ძალისხმევათა ნაყოფი, იმ გულწრფელობითა და ბუნებრივი კეთილშობილებით რომ არ ვყოფილიყავი წაქეზებული, ასე რომ ასხივოსნებს თქვენი ბრწყინვალების ხასიათს. მილორდ, შემიძლია დავამატო, რომ განსაკუთრებული წყალობა და სიუხვე, რომელიც თქვენ ისურვეთ გამოგევლინათ ჩვენი საზოგადოებისადმი, იმედს მინერგავს, რომ თქვენ უარს არ იტყვით მისი ერთ-ერთი წევრის კვლევათა მხარდაჭერაზე. ამ მოსაზრებებმა მიბიძგეს, წინამდებარე ტრაქტატი თქვენი ბრწყინვალების ფერხთა წინაშე გამეშალა, მით უმეტეს, რომ მივისწრაფი გაცნობოთ, რომ ყველაზე გულწრფელი და ღრმა პატივისცემით, იმ ცოდნისა და სათნოების წყალობით, რომელიც ესოდენ აოცებს ყველას თქვენს ბრწყინვალებაში, მილორდ
ვრჩები თქვენს უმორჩილეს
და უერთგულეს მსახურად
ჯორჯ ბერკლი
ჩუქება
