ქრისტიან კარლსონი თანამედროვე შვედი პოეტი, მთარგმნელი და ვიდეოარტისტია. არის 30-ზე მეტი ორიგინალური და ნათარგმნი წიგნის ავტორი. წერს შვედურ და ინგლისურ ენებზე. “ანბანის ამოხსნა” ქართულ ენაზე ქრისტიან კარლსონის პირველი პოეტური კრებულია. მასში გაერთიანებულია მრავალფეროვანი პოეტური სტილისა და შინაარსის 1997–2017 წლებში დაწერილი ლექსები, რომლებიც ინგლისურიდან თარგმნეს მანანა მათიაშვილმა და პაატა შამუგიამ. ქრისტიან კარლსონის ნაწარმოებების თავისებურება სტილებისა და იმიჯების მუდმივი ცვლა და შერევაა, რაც ენობრივ ექსპერიმენტებსა და სოციო-პოლიტიკური ფაქტების ირონიულ-ფილოსოფიურ ინტერპრეტაციებში გამოიხატება. "მე მინდა, გამოვიწვიო ენა და მისი წესები", - ასე აღწერს კარლსონი საკუთარ შემოქმედებით პრაქტიკას ერთ-ერთ ინტერვიუში.