წინასიტყვაობა
როსიოსთვის
Ainsi l’âme va d’un extrême à l’autre,
de l’expansion de sa propre vie à l’expansion
de la vie de tous.
MARCEL SCHWOB
Coeur double (ასე გადადის სული ერთი უკიდურესობიდან მეორეში და საკუთარი ცხოვრებიდან დაწყებული თითოეულის ცხოვრებას აფართოებს. მარსელ შვობი, „ორმაგი გული“)
(...) როგორც ქვიშის ორი მარცვლის მორევი (...)
ხოსე მორენო ვილია
„წითური ხასინტა“
ასი მილი ვიარე უდაბნოს მზეში,
რომ მომცემოდა წასვლის შანსი
შენთან ერთად, ჰო.
ქიუსი
„წითელი მზის ბლუზი
„მოგზაურობისა და უდაბნოს მოკლე თეორია“ ეჭვქვეშ აყენებს იმ მიღებულ წესებსა და კანონებს, რომლებიც გვასწავლიან, თუ როგორი უნდა იყოს ლიტერატურაში თხრობის ფორმალური ბუნება.
ამ წიგნში წარმოდგენილი კრისტიან კრუსატის ექვსი მოთხრობა მკითხველს ამოგზაურებს მსოფლიოს სხვადასხვა კუთხეში, დაწყებული ხმელთაშუაზღვის სანაპიროს მშრალი პეიზაჟებიდან, დამთავრებული გენიალური სერბი მწერლის, მილორად პავიჩის წიგნის გვერდებით. წერის განსაკუთრებული სტილის წყალობით, რომელიც ადვილად ახდენს ადაპტაციას თითოეული მოთხრობის ფიზიკურ თუ წარმოსახვით ადგილებთან და იქ მცხოვრები ადამიანების მყიფე ინდივიდუალიზმთან, მწერალი თავის პერსონაჟებს მიუძღვება შიშის, ეჭვებისა და სურვილების უფსკრულებისკენ, რომლებიც ჩვენს თანამედროვე ყოფას ქმნიან.
თითოეული მათგანი ელოდება და ეძებს შთაგონების შესაძლებლობას, მაგრამ მათ არ ძალუძთ რაიმე ეფექტური ქმედების განხორციელება. სულს კი ცვლილებები სჭირდება, რადგან სუფისტური მისტიკის თანახმად, უძრაობა უდრის ნელ სიკვდილს, რომელიც ყველგან დაგვყვება, იქნება ეს უკაცური შარაგზები, ცარიელი სადგომები თუ ტურისტების სავსე სასტუმროები. სწორედ ესაა რეალური უდაბნო, სადაც პერსონაჟებს თავს გადახდებათ ბედნიერი თუ უბედური შემთხვევები (უმნიშვნელო ინციდენტი, ნუდისტურ პლიაჟზე გონების დაკარგვა, ავიაკატასტროფა, რომელიც არ მოხდა), რომლებიც მათში იწვევს შთაგონებას, როგორც აფეთქებისას და სწორედ ესაა ადამიანის მარტოობის ნამდვილი სახე.