როტშილდების გერბზე გამოსახულია ხუთი ისარი. ისრები სიმბოლურად მაიერ როტშილდის ხუთ შვილს გამოხატავენ. მაიერ როტშილდის მეხუთე შვილი- ჯეიმს მაიერ როტშილდი, ის საქმოსანი იყო, რომელსაც რუსეთის იმპერიაში საქმის კეთება უნდოდა. თუმცა, ბევრი ვერ მოასწრო და მისმა შვილებმა ალფონსმა და ედმუნდმა გააგრძელეს ამ მიმართულებით მუშაობა. ნავთობის მოპოვება, ჭურჭელში ჩასხმა და ბაზარზე გატანა გახდა როტშილდებისთვის უმთავრესი საქმე კავკასიაში. როტშილდებმა ნიკო ნიკოლაძის შუამდგომლობით, ბათუმში, პალაშკოვსკის და ბუნგეს ტარის ქარხანა იყიდეს და შავი ზღვით ნავთობის ექსპორტი დაიწყეს. ნიკო ნიკოლაძემ სერგეი პალაშკოვსკი ჟენევაში გაიცნო. ისინი მეზობლები იყვნენ და ჰერცენთან და ოგარიოვთან ურთიერთობდნენ. ნიკო ნიკოლაძის და სერგეი პალაშკოვსკის მეგობრობა მათი სიცოცხლის ბოლომდე გაგრძელდა. სერგეი პალაშკოვსკი, აბრამ ზაკი და გენადი რომანოვსკი ნიკო ნიკოლაძეს გაზეთ „ობზორის“ გამოცემაში ეხმარებოდნენ. თუ რა პირობებში უხდებოდათ როტშილდებს საქმიანობა კავკასიაში, როგორ ედგათ მათ გვერდით ნიკო ნიკოლაძე და საერთოდ რამხელა შესაძლებლობის საქმოსანი და ორგანიზატორი იყო ნიკო ნიკოლაძე, აღწერილია წიგნში „ისარი კავკასიისკენ გადაიხარა.“