შესავალი მზემ თვალები მოიფშვნიტა, პირი დაიბანა, ვარსკვლავებს და მთვარეს ანიშნა ძილის დროაო და ცარიელ ცაზე შეაბიჯა. დამრგვალდა, გაგორდა და მცხუნვარე სხივები მძინარა ბომბორას ყვითელი სახლის საძინებელში შეაჭყიტა. მასპინძელი კარგად გამოაფხიზლა, საუზმეზეც დაეწვია. მერე მზემ ბომბორას ყურში რაღაც უჩურჩულა და წავიდა.
ოჰ რა ძალიან ცხელა, - თავისთვის ბუტბუტებდა ბომბორა და თავის ულამაზეს ეზოში დააბიჯებდა. მერე უცებ ჭიშკარი გაიხურა, ქვაფენილიან აღმართს ნელ-ნელა აუყვა და გალავნიანი სახლის ეზოში ამოყო თავი. ჭორიკანა სუროებს მიუახლოვდა, ჯერ ცივი წყაროს წლით სახე გაიგრილა და მერე პეშვით დალია. ისე გაფაციცებით აკვირდებოდა ამ ეზოს თითქოს პირველად იყო, არადა დაზეპირებული ჰქონდა აქაურობა. იქვე ჩამოჯდა, მაღლა ცას უცქერდა და თან არემარეს ათვალიერებდა. გახუნებულ, ნახევრადჩამოშლილ შუშაბანდსაც სიბრალულით შეავლო თვალი. სადღაც კუთხეში, სარკესთან მჯდარი ქერათმიანი, თეთრი პირსახის გოგონა შენიშნა... შეყოვნდა და დააკვირდა როგორ კეკლუცობდა სარკის წინ. გოგონას ეზოდან მოთვალთვალე კეთილი, უცნობი პრინცი არც კი შეუნიშნავს. ეს ამბავი მასთან პირველ პაემანზე შეიტყო.
ასე დაიწყო ფარფატას და ბომბორას სიყვარულის ისტორია. მათ ერთმანეთი ძალიან შეუყვარდათ. თბილმა და მოსიყვარულე ბომბორამ იმდენი სითბო და ლამაზი სიტყვა აფრქვია, გოგონას თავბრუ დაესხა და მის გარდა ვეღარაფერს ხედავდა. შემდეგ ბომბორამ ფარფატა ცოლად შეირთო და თავის ყვითელ სახლში სამუდამოდ გადააბარგა. ცოლ-ქმარი ღმერთმა მალევე უდიდისი საჩუქრით დააჯილდოვა და ერთის ნაცვლად ორი ოქროსფერთმიანი, ტყუპი ყმაწვილი აჩუქა. მზემ თვალი მოჰკრა თუ არა პაწაწინებს, მათთან ჩასახლდა და ისედაც თბილი სახლი კიდევ უფრო გაახურა. ამ სითბოს ზაფხულის ყველაზე ცხელ დღესაც კი, ბევრი ადამიანი ნატრობდა. მაგრამ, მრგვალმა მზემ ტყუპთა ოჯახი ისე შეიყვარა, ფეხს ვერსად მოაცვლევინებდით.
მშობლებს მათ სახელებზე ბევრი არ უფიქრიათ. ფარფატამ პირმშოებს სახელები დანახვისთანავე შეურჩია. პირველი ტყუპისცალი ისეთი თეთრი და ფუმფულა გაჩნდა, რომ რა მოუხდებოდა მას, თუ არა ბუშტუკა, მოფერებით - ფუმფულიკასაც ეძახდნენ.(მას ორივე სახელი ძალიან უხდება, ამიტომ ხან ბუშტუკას ვიტყვი, ხან ფუმფულიკას, ამან არ დაგაბნიოთ). მეორე ყმაწვილი დაბადებისთანავე დედას მიეწება ბუსუსივით და იმ დღის შემდეგ აღარც მოსცილებია - ამიტომ მას ბუსუსა დაარქვეს. სახელები მართლაც მათზე ზედგამოჭრილი იყო. თავიდანვე სითბოსა და სიყვარულს მიჩვეული პატარები სულ მოფერებას ითხოვდნენ.
ლუკა, ანასტასია, კატო, დაჩი, რა ვიცი ვინმე არ გამომრჩეს ჩემო ძვირფასებო. ცნობისმოყვარენო და წიგნისმოყვარულნო, ვიცი გაინტერესებთ მათი გარეგნობა, ამაში დარწმუნებული ვარ, ამიტომ დავიწყოთ პირველი ტყუპისცალით - ბუშტუკათი. ის თავის ძმაზე სულ ორი წუთით იყო უფროსი. როგორც უკვე გითხარით, ცომის გუნდასავით მრგვალი და ფუმფულა გახლდათ. ძალიან ქერა, გრძელი, აპრეხილი წამწამები და თითქმის თეთრი თმა ჰქონდა. ყველაზე მეტად ფაფა და ძილი უყვარდა. ჭამის დრო რომ მოახლოვდებოდა, მოცუცქნულ, ვარდისფერ ტუჩებს თოჯინასავით გაპრანჭავდა და ბოლო ხმაზე ღრიალებდა - გეგონებოდათ ერთი კვირის მშიერიაო. ვერც უძილობას იტანდა, თუმცა ამის გამო არავის შეაწუხებდა, ახლომახლო რამეს ან ვინმეს მიადებდა თავს და უდარდელ ხვირინვას ამოუშვებდა. მძინარეს ლოყები კიდევ უფრო ებერებოდა და უვარდისფერდებოდა. ისეთი საყვარელი იყო ვერავინ უძლებდა მის მშვიდად მზერას, ხან ვინ წაუთათუნებდა ხელს და ხან ვინ.
გადავიდეთ ბუსუსაზე. მან დაბადების პირველივე წამიდან თავი ყველას პრენტენზიული ტირილით გააცნო. მისი კოკროჭინასავით ლამაზი სახის ნაკვთები და ნუშისებური, აზრიანი თვალები ცნობისმოყვარე ხასიათზე მიუთითებდა. პატარა ბუსუსას ვერაფერს გამოაპარებდით, ყველაფერი აინტერესებდა და ამიტომაც სამყაროს დაქაჩული თვალებით აკვირდებოდა. მნიშვნელობა არ ჰქონდა შიოდა, რამე აწუხებდა თუ არა - ერთი წუთითაც ვერ დატოვებდით უყურადღებოდ, მაშინვე აზუზუნდებოდა და სანამ დედა გულში არ ჩაიკრავდა არ ჩუმდებოდა. მან ექიმები სამშობიაროშივე ანერვიულა. უმიზეზოდ ატირებული ბავშვით შეწუხებულები პალატაში რამდენჯერმე შეცვივდნენ. ბოლოს დარწმუნდნენ, რომ ბუსუსას არაფერი ტკიოდა, უბრალოდ ეს მისი ხასიათი იყო. ერთმა ბებია ქალმა მისივე ტოლი ახალშობილი პატარა გოგოც კი შეუყვანა, ბუსუსამ მასაც ცნობისმოყვარედ გადახედა, ერთი წამით გაჩერდა და მერე ისევ აყვირდა.
ეს რა პრეტენზიული იქნება, მგონი ესეც დაიწუნა, - ჩაილაპარაკა ღიმილით ბებია ქალმა და პატარა გოგონა ხელში აიყვანა.
გემრიელი ფაფები და რძე ბუსუსასაც უყვარდა, რაც მის ათლეტურ გარეგნობას საერთოდ არ ეტყობოდა.
ტყუპებს ორადგილიანი საქანელა საწოლი ჰქონდათ. ერთმანეთზე თავმიდებულებს ეძინათ, როგორც კი
ჩუქება
