ავტორისაგან ეს წიგნი საოჯახო ფოტოალბომს ჰგავს, სადაც ოჯახის წევრთა პორტრეტები და ჯგუფური ფოტოები ინახება ხოლმე, ბავშვობიდან ღრმა სიბერემდე, გადაღებული მხიარული შეხვედრებისას, არდადეგებზე, სადღესასწაულო სუფრასთან, მოგზაურობისას, ან რამე თარიღთან დაკავშირებით.
ამ ლექსებში თავმოყრილია ჩემს მეხსიერებაში ფოტოკადრებად შემონახული ამბები, რომელთაც სხვადასხვა მიზეზის გამო, ბოლო სამი წლის განმავლობაში ინტენსიურად მაწვდიდა და მიცოცხლებდა მოგონებათა არქივი. გადავწყვიტე, მათთვის ლექსის ფორმა მიმეცა, რომ ასე უფრო საიმედოდ შემენახა, რადგან მათი „გადაღების ადგილს“ არა მხოლოდ დროში, სივრცეშიც ძალიან დავშორდი.
აქ იმ ამბებსაც მოისმენთ, რაც ამ წლებში გზადაგზა გადამხდა და იმ ადამიანებსაც ნახავთ, ვინც ამ გზებზე გავიცანი და დავიწყება ვეღარ მოვახერხე.
კრებულს თან ვურთავ გერმანელი მხატვრის, ლუც ლაიბნერის გრაფიკულ ნამუშევრებს. იგი საქართველოში ორჯერ ჩამოვიდა და მას შემდეგ ქართული მოტივები მისი შემოქმედების თანამდევად იქცა. ჩვენი ეს კონკრეტული თანამშრომლობა კი იმ თემის გაგრძელებაა, რასაც მე „ცა და შლეიფი“ დავარქვი და რაც იმ ძებნასა და ძიებებს გულისხმობს, მთელი ცხოვრება რომ არ გვასვენებს.