„თუ გინდა მშიერ ადამიანს დაეხმარო, თევზის მაგივრად ანკესი მიეცი და თევზაობა ასწავლე“, - ჩინური ანდაზა. ჩემ მეგობარ ნიკას კუდრაჭა ქუთაისელი, მაგდა უყვარდა. კლასიკური სილამაზით „ გერმანელ ღვთისმშობელს “ ჩამოჰგავდა. გულდათუთქული ვერაფრით მიწვდა, ყოველ შეხვედრაზე სხეულში რეტიანივით კანკალი უტყდებოდა, ქალს რას გამოაპარებ, - ნიკუშ, კარგი ბიჭი ხარ, მაგრამ მაპატიე, შენგან მამაკაცური ვნება ვერაფრით ვიგრძენი, ბიჭოო, - მორიდებულად პირში სტკიცა.
მართალიც ბრძანდებოდა, რაის ვნება, როცა გითხარით გარკვევით, კანკალებდა მისი დანახვისთანავე, ამ უმწეო კრავისებრ ცახცახს ვერაფერს უშვრებოდა, სულ კბილების კაწა-კუწით იყიდებოდა. ვერაფერი რომ იღონა, გულგახეთქილმა ლექსი აჩუქა:
- სხვა არ მინდა ქვეყანაზე, მაგ თვალების გარდა,
ერთი ნახვით შემიყვარდი, მშვენიერო მაგდა.
ავტობუსში გნახე, მსწრაფლ თვალთ დამიბნელდა,
მზერა ვერ აგყარე, სულ დავბრმავდი მაგდა.
ბევრი მქონდა დარდი, სიყვარულის გარდა,
შლეგივით დავდიოდი, შემაჩერე მაგდა,
ღამეები არ მეძინა, სხვას ვფიქრობდი განა?
შენს ხატს ვლოცულობდი, დაკარგულო მაგდა.
არ ველოდი არა, კვლავ შეხვედრას შენთან,
თვით ღვთის ნებით გნახე, ინსტიტუტში მაგდა,
მაშინ კი ვიფიქრე, ბედი შემხვდა მართლა,
იქვე გადავწყვიტე, გაგაღმერთო მაგდა!
მაგდამ, მართლა კარგი ადამიანი ხარ ნიკუშ, მაგრამ შენგან ვნება ვერაფრით ვიგრძენი, ბიჭოო!
მალევე კანკალა ბიჭს ბინის კარებზე დაადგა, - იცი, მე გერმანიაში მივდივარო. ვნებაჩამქრალმა ქუთაისის ღირშესანიშნაობების ფერადი ჟურნალი გაატანა, რომელშიც რემარკის „ სამ მეგობარზე “ დაწერილი ლექსი ჩაუწერა:
„ რემარკის კითხვამ შემძრა,
„ სამ მეგობარს “ ვერ ვშორდები,
სულს ღრმა იარა შერჩა,
პატის, ჰოლმანის დაკარგვით.
რობის სიკვდილი სწყუროდა,
რომში აღრჩობდა სევდას,
ოტოს და გოტფრიდს ელოდა,
სხვა არვინ ჰყავდა ეულს.
როგორც ცისკრის ვარსკვლავმა,
პატის სიცოცხლემ იფეთქა,
ვერც კი იაზრა რობერტმა,
სულში სიყვარულს ეფეთქა.
მათთვის დროც კი გაუქმდა,
დარჩა მთლად ნეტარება,
სულნი შეერწყნენ ძალუმად,
წარსული ვისღა ახსოვდა?
პატს კი დრო აღარ რჩებოდა,
სენი ბობოქრად მძლავრობდა,
ამქვეყნად რობის ტოვებდა,
მის გულში მარად რჩებოდა.
პეპელა ერთ დღეს ცოცხლობდა,
სულ ყვავილ-ყვავილ დახტოდა,
ამ დღეს სიყვარულს უთმობდა,
იმქვეყნად საგზლად მიჰქონდა.
პატიც პეპელას ჰგავდა,
ყვავილად რობი ჰყავდა...
რემარკის კითხვამ შემძრა,
„ სამ მეგობარს “ ვერ ვშორდები,
სულს ღრმა იარა შერჩა,
პატის ჰოლმანის დაკარგვით.
ასე დაეკარგა პატრიცია ჰოლმანის შემდეგ ქუთაისელ-გერმანელი „ ღვთისმშობელი “ მაგდა. „ აუ-პეიერის “ ერთწლიანი პროგრამის დასრულებისთანავე თბილისში დაბრუნებულმა, თავი დაადო გათხოვდა. კინკილა ბიჭი არც კი მოუკითხავს. ნიკამ მისი ამბავი არ იცოდა, ილიაუნის აუდიტორიაში თავზე დაადგა, ვნებასთან ერთად კანკალიც იქვე ჩაუქრა.
- გია, შენ იცი, ჩემთვის გერმანია წესრიგთან, სიძლიერესთან ერთად სილამაზესთანაც ასოცირდება, - მეუბნება ჩემი მეგობარი.
- ისე ამბობ, შენ არგუმენტებიც გექნება, - ვაქეზებ, რადგან ვიცი მისი წარმოსახვის უსაზღვროობა.
- ბიჭო, სსრკ-ს პერიოდში ჩემი სოფლიდან გერმანიაში ჯარში სამსახურისთვის ყველაზე სიმპატიურები და გამორჩეულები მიყავდათ. აი მაგალითად, ჩემი ბიძაშვილი და კარის მეზობელი იყვნენ ასეთები.
- მერე რა ჩამოგიტანეს იქიდან?
- ულამაზესი ქალების „ ნეკლეიკები “ , სახლში ყველა დიდასა თუ პატარა კარადაზე მივაწებე და იქიდან მინათებდნენ მთელ ბავშვობას. კიდევ მეზობლის მონაყოლი დამამახსოვრდა - იქ ქუჩაში რომ გავივილდით საბჭოთა ჯარისკაცები, შაოსანი ქალები პატარ-პატარა ქვებს გვესროდნენ, როგორც ოკუპანტებსო; გულის სიღრმეში ვბრაზდებოდით, იქვე იმასაც ვგრძნობდით, ჩვენი ამ მიწაზე ყოფნა რომ არავის უხაროდაო...
- დღეს სად არიან შენი ეს თანასოფლელები?
- ძირითადად რუსეთში შავ სამუშოებზე, ნორილსკი და ვორკუტა მაინც გაგონილი გექნება; მოწესრიგებულობით ყველგან გამოირჩევიან, მათგან უმეტსობამ მეტსახელიც კარგად შეიფერა - გერმანია...
„ ვარდების რევოლუციამ “ ნიკას „ გამოხმაურების “ (ასე ჰქვია) რედაქციაში მოუსწრო. კოლეგები მწირი ხელფასის მომატებას მოელოდნენ, რადგან გაზეთის გამომცემელი წალენჯიხიდან წამოსულ მომიტინგეებს საკუთარი მოტოციკლეტით წინ მოუძღვებოდა. რევოლუციამ გაიმარჯვა, ხელფასი კიდევ უფრო შემცირდა, ყველას თვალი გაქცევაზე ეჭირა, საკითხავი ისაა, საით?
- უკვე დაოჯახებული ვიყავი და სასწრაფოდ რამე უნდა მეღონა, - მეუბნება ნიკა.
- და რა იღონე?
- ავდექი და ჰუმანისტი კაცი ეროვნულ პოლიციაში წავედი სამუშაოდ. ერთ წელიწადში მივხვდი, რომ მარტო ხელფასის გულისთვის ვერ იმუშავებ ადამიანი. ყველა დასაჭერი თუ დაჭერილი ცრემლებამდე მეცოდებოდა და მის მხარეზე ვიყავი; აბა, ასეთი აზიზ-გულჩვილი სამართალდამცველი ვის გაუგონია?
- მერე რა ქენი?
- ყველა უბედურებასთან ერთად, 2008 წლის აგვისტოს ომმაც მომისწრო. განყოფილებიდან ფრონტზე წასასვლელების სიაში პირველი ჩავეწერე, წესიერად ცხოვრება ქვეყანაზე მე არ შემიძლია, შანსი მომეცა და იქნებ გმირულად მაინც მოვკვდე-მეთქი; როცა ამ დროს განყოფილების სათავსოში შენახული ჩაჟანგებული „ კალაშნიკოვის