რომანში მოქმედება სამ სხვადასხვა ადგილას ვითარდება, მოქმედი პირები ყველგან სხვადასხვაა, თუმცა, როგორც ირკვევა, ისინი ერთმანეთთან არიან დაკავშირებული... 1947 წლის ჰამბურგი. გაუსაძლისი სიცივე, სურსათის დეფიციტი. ადამიანები იყინებიან. აგნეს დიცი დაბომბილი სახლის ოთახში ურთულეს პირობებში ცდილობს შვილებთან ჰანოსთან და ვიბკესთან ერთად თავის გადარჩენას. თხუთმეტი წლის ჰანო ნანგრევებში ეძებს ყველაფერს, რისი გამოყენებაც შესაძლებელია. შემდეგ მათ შავ ბაზარზე სურსათში ცვლის. ერთ დღეს დაბომბილ სარდაფში ქალის ცხედარს ნახულობს, იქიდან ამოსული კი თავისი დის გვერდით პატარა უცნობ ბიჭს, რომელიც სრულიად მარტოა და არ ლაპარაკობს. და-ძმას ბიჭი სახლში მიჰყავს და დედასაც არწმუნებს, რომ ბავშვი დაიტოვონ. ბიჭი წლების შემდეგ იგებს, რომ აყვანილია და ცდილობს მისი წარმომავლობის შესახებ ცნობების მოძიებას… 1945 წლის აპრილი. უკერმარკში მდებარე ანკვისტის მამულში ჰაინრიხი თავის ქალიშვილ კლარასთან, რძალთან, შვილიშვილებთან და მოსამსახურეებთან ერთად ცხოვრობს. დამარცხებული გერმანიის აღმოსავლეთ ნაწილში საბჭოთა არმია ყველაფერს იკავებს და მათ მამულს კონფისკაცია ემუქრება. სიტუაცია დღითიდღე მწვავდება. ოჯახს გაქცევა უწევს და ბევრ სირთულეს აწყდება... კიოლნი, 1992 წელი. ანა მერბაუმის ყოფილი ქმარი თომასი, რომელიც ადვოკატად მუშაობს, გერმანიის გაერთიანების შემდეგ ემსახურება ერთ-ერთ კლიენტს, რომელიც ცდილობს დაიბრუნოს თავისი საკუთრება საქსონიაში. მას ახსენდება ანას ბაბუის მამული უკერმარკში, რომელიც ომის შემდეგ ჩამოართვეს. ის ანას ამ თემაზე ჩამოუგდებს საუბარს და არწმუნებს, დაელაპარაკოს დედას ამ საკითხზე. თუმცა ანას დედისთვის უკერმარკის თემა ტაბუდადებულია და ყოველთვის გაურბის ამაზე საუბარს. ანა დამოუკიდებლად იწყებს ინფორმაციის მოძიებას და საკუთარი ოჯახის საშინელ საიდუმლოს იგებს...