წინასიტყვაობა - მათ, ვინც საკუთარ კურსს ადგას და გზად ხანძრის კერებს აჩენს თუ შეიძენთ შეიკერ-ჰაიტსის ვრცელ ტერიტორიაზე არსებულ საკარმიდამო ნაკვეთს სკოლის მიმდებარედ ან ჩვენი კომპანიის მიერ შემოთავაზებულ ერთ-ერთ სახლს თქვენთვის სასურველ უბანში, ისარგებლებთ გოლფის, ჯირითის, ჩოგბურთისა და ნაოსნობის სერვისებით; ასევე, პრესტიჟული სკოლებით; ამასთან, მიიღებთ ულიმიტო დაზღვევას არასასურველი ცვლილებებისა და ქონების გაუფასურებისაგან.
სარეკლამო განცხადება, „ვან სვერინგენ კომპანი“,
შეიკერ-ვილიჯის დამფუძნებლები და დეველოპერები.
სინამდვილეში, ყველაფრის გათვალისწინებით, შეიკერ-ჰაიტსის მცხოვრებლები თითქმის არაფრით განსხვავდებიან სხვა რიგითი ამერიკელებისგან. შეიძლება მათ, ერთი ან ორის ნაცვლად, სამი ან ოთხი ავტომობილი ჰყავდეთ, შინ ერთი ტელევიზორის ნაცვლად, ორი ედგათ, საქორწინო ცერემონიაზე ადგილობრივი ბენდისა და ასი სტუმრის ნაცვლად, რვაასი დაპატიჟონ და ნიუ-იორკიდან, სპეციალურად, მეიერ დეივისის ორკესტრი გადმოაფრინონ, მაგრამ სხვაობა მხოლოდ ხარისხობრივია და არა არსობრივი. „ჩვენ მეგობრული ხალხი ვართ და შესანიშნავად ვცხოვრობთ!“ – განაცხადა ქალბატონმა „შეიკერ-ჰაიტსის ქანთრი კლუბში“ და მართალიც იყო, რადგან, როგორც ჩანს, „უტოპიის“ მკვიდრებს საკმაოდ ბედნიერი ცხოვრება აქვთ.
– „შეიკერ-ჰაიტსის საამური ცხოვრება“, ჟურნალი Cosmopolitan, მარტი, 1963 წელი.