გამომცემლისგან პატარა გოგო იყო, რომ გავიცანი. ჩემი სტუდენტი გახლდათ. მალევე – მეგობარი, ნასტუდენტარი, თანამშრომელი.
თბილი, ბუნჩულა, სულ ღიმილიანი, მოცინარი, დინჯი, მშრომელი, ხალისიანი, მშვიდობისმოყვარე და სიყვარულისმოყვარე.
სულ-სულ პირველი კადრი, რაც გონებამ შემოინახა, ჯერაც კარგად გაცნობამდე, დაახლოებამდე, შემოთამამებამდე და დამეგობრებამდე, ასეთი იყო:
უშველებელ აუდიტორიაში, ერთმანეთისგან დაშორებით, უამრავი სტუდენტი იჯდა. ტესტს ვაწერინებდი. მაშინ სად იყო ტესტები და არც ამდენი სწავლაზე ორიენტირებული სტუდენტი გახლდათ და ახალგაზრდების დიდი ნაწილიც თანაკურსელების იმედად შემოდიოდა. იყო ერთი ჩურჩულობა, ერთმანეთის წახმარება და იოლად ფონს გასვლის დაუცხრომელი წადილი.
შენიშვნებით რომ ვერაფერი გავაწყვე, ბოლოს ესღა მოვიფიქრე: ერთი გადალაპარაკება და ტესტს ჩამოგართმევთ-მეთქი!
შევამჩნიე, ამ გოგომ გვერდით მერხზე თანაკურსელს გადაულაპარაკა. ახლავე ჩამაბარე ნაწერი-მეთქი. უხმოდ ადგა, წამოწითლდა, დაუსრულებელი ტესტი დამიტოვა და ნელა და უჩუმრად გავიდა.
მეუცნაურა. ჟურნალისტიკის ფაკულტეტზე, როგორც წესი, უფრო თამამები სწავლობდნენ. ხშირად მეკამათებოდნენ, არ მეპუებოდნენ, მებუზღუნებოდნენ, ან მთხოვდნენ, ან მპირდებოდნენ, რომ მეტს აღარ იზამდნენ...
ეს კი როგორ უჩვეულოდ უხმაუროდ გავიდა...
გამიკვირდა. დამამახსოვრდა და მივხვდი, რომ რაღაც ისე არ იყო.
გული ჩამწყდა, როცა მოგვიანებით გავიგე, რომ თურმე აქეთ გადმოულაპარაკეს და იქით ეხმარებოდა. ვინც დახმარება სთხოვა, ის გაიტრუნა, ეს კი ადგა და გავიდა...
მას მერე განსაკუთრებულად შემიყვარდა. ან სხვანაირად როგორ შეიძლებოდა. აი, ასეთი იყო, ზუსტად ასეთი, როგორსაც აქ, ამ ფოტოზე ხედავთ.
ასეთი კარგი, ასეთი უშუალო, ასეთი კეთილი და თბილი...
„ბუბ“ – სულ რამდენიმე ადამიანი მომმართავს ასე, თითებზე ჩამოსათვლელი. ერთ-ერთი ნეკერა იყო. ნეკერას ვეძახდით ყველანი და როგორც მერე და მერე გაირკვა, მთელი სამყაროსთვისაც ნეკერა ყოფილა.
„ბუბ“ – დამიძახებდა მხოლოდ მას რომ ჰქონდა, იმ ხმით, მოჭუტული თვალებითა და გაბადრული პირისახით...
ახლა ვიხსენებ და რამდენი სითბო და ენერგია მოუცია თურმე 15 წლის მანძილზე. მთელი ცხოვრება რომ მეყოფა, იმხელა და იმდენი...
ნეკერ, ვერაფრით ვიჯერებ, რომ იქით ხარ. სად წახვედი...
როგორ უჩვეულოდ და უჩუმრად წახვედი... აი, მაშინ რომ ადექი და გახვედი, ზუსტად ისე. მართალი და ჩუმად...
. . . . . . . . . . . . .
ეს პატარა წიგნი მადლობის და ბოდიშის თქმის უსუსური მცდელობაა.
მადლობა ნეკერ, სითბოსთვის.
და ბოდიში, დაკლებული სითბოსთვის.
ბუბა კუდავა