მკითხველისთვის
შერლოკ ჰოლმსი, როცა ჯერ კიდევ ბავშვი იყო და არა ცნობილი გამომძიებელი, ორ მეგობართან ერთად იძიებდა საიდუმლოებით მოცულ საქმეებს. მაშინ, როცა ამას არავინ ავალებდა, ცნობისმოყვარე და ძალზე გონებამახვილი შერლოკი, ირენ ადლერთან და არსენ ლუპენთან ერთად, ცდილობდა სიმართლის გარკვევას.
„ალისფერი ვარდის საიდუმლო“ ერთ-ერთია იმ თავგადასავლებიდან, რომლებში მონაწილეობაც მკითხველს შეეძლება. წიგნი „შერლოკი, ლუპენი და მე“ ბევრ სხვადასხვა ამბავს აერთიანებს, პატარა გამომძიებლების სახიფათო ისტორიებზე გვიყვება და მკითხველებსაც გამომძიებლებად აქცევს.
მოქმედება ლონდონში ხდება, წინასაშობაო დღეებში, როცა ყველა ბავშვი საჩუქრების ყიდვითა და ტკბილეულის ჭამითაა გართული, მით უფრო ისინი, ვისაც უზრუნველი ბავშვობა აქვთ. ირენ ადლერი სწორედ ასეთი ბავშვია – მაღალი წრის, შეძლებული ოჯახიდან, თუმცა სრულებით არ ჰგავს თანატოლებს. ის მეტისმეტად გონიერი და ცნობისმოყვარეა საიმისოდ, რომ მხოლოდ სახლის საქმეებით დაკავდეს. ირენი შერლოკის განუყრელი მეგობარია და ყოველთვის მზადაა, მხარში ამოუდგეს. ირენი რისკავს, რადგან მისთვის მთავარია, სასიკეთო საქმეები აკეთოს.
„ალისფერი ვარდის საიდუმლო“ დიდი თავსატეხით იწყება: ჰოლმსი მიხვდება, რომ ჟურნალ „ტაიმსის“ ერთ-ერთი საჭადრაკო ამოცანა დაშიფრული კოდია, რომელიც ბურუსით მოცულ ინფორმაციას მალავს. კოდის აღმოჩენიდან მეორე დღეს ლონდონში მკვლელობა ხდება. უცნაური ის არის, რომ სკოტლანდ იარდი მკვლელობის შესახებ ბევრ დეტალს მალავს, მათ შორის, მკვლელობის ადგილზე ალისფერი ვარდის აღმოჩენას. მკვლელობის დეტალები საიდუმლოებითაა მოცული და ეს თავსატეხი შერლოკმა, ირენმა და ლუპენმა უნდა ამოხსნან.
ალისფერი ვარდი ლონდონის ცნობილ დანაშაულებრივ ბანდას უკავშირდება, რომლის შესაძლო დაბრუნებაც საზოგადოებაში პანიკასა და ისტერიას იწვევს, ამიტომ აუცილებელია გაირკვეს – დაბრუნდა ალისფერი ვარდის ბანდა? ამ კითხვაზე პასუხისათვის კი საჭიროა ისეთი თვისებების ერთობლიობა, როგორიც შერლოკს, ირენსა და არსენს აქვთ: გონიერება, სიმამაცე, ინტუიცია და მოხერხებულობა.