წინასიტყვაობა
2020 წელი თავისუფლად შეიძლება წინასააპოკალიფსო გენერალური რეპეტიციის წლად გამოვაცხადოთ. ჩვენ თვალწინ ის სამყარო გადაიშალა, რომელიც უამრავ ფილმსა თუ წიგნშია აღწერილი. პლანეტა გაჩერდა და ჩვენთვის ყველაფერი ნაცნობი იყო. თითქოს ეს აქამდეც ბევრჯერ გვქონდა განცდილი. ასეც არის – ეს ხომ უკვე განვიცადეთ ლიტერატურისა და კინოს მეშვეობით. ამ პერიოდმა ნათლად აჩვენა, თუ რა დიდი ძალა აქვს ჟანრულ ლიტერატურას. ჰორორში, ფენტეზისა და, განსაკუთრებით, სამეცნიერო ფანტასტიკაში სამყაროს აღსასრული და თვითგადარჩენისთვის ბრძოლა, პანდემიები და ეკონომიკური კოლაფსები სიუჟეტშივე დეტერმინირებულია. ამიტომაც გვქონდა განცდა, რომ ერთ მშვენიერ დღეს ყველამ აპოკალიფსურ მომავალში გავიღვიძეთ. ამ განწყობის შექმნა ჩვენი საქმეა – მათი, ვინც ფანტასტიკას თხზავს, ვინც მომავლისგან ამზადებს მრავალჯერადი მოხმარების პროდუქტს ნიჰილიზმში ჩვენი გადაჩეხისა თუ მისგან გათავისუფლების მიზნით. ვფიქრობ, ფესტივალ „ინსომნიას“ თავისი წვლილი შეაქვს ამ დიდ საქმეში.
საერთოდ, პრეაპოკალიფსური სტრესი უნდა იწვევდეს ინსომნიას; თუმცა ჩვენ გადავწყვიტეთ, უძილობით ვებრძოლოთ პანდემიითა და იზოლაციით გამოწვეულ ნერვულ აშლილობებს. ბოლოს და ბოლოს, ერთ სივრცეში გამოკეტვა ხომ ამ ფესტივალის ერთ-ერთი მთავარი პირობაა. ჩვენ ამას ყოველ წელს ვაკეთებდით: მწერლებს ერთ სივრცეში ვკეტავდით, ღამის გათენებასა და წერას ვაიძულებდით.
„ინსომნია“ პირველი ქართული ჟანრული ლიტერატურული ფესტივალია, რომელიც ფანტასტიკის, ფენტეზისა და ჰორორის ჟანრის მხატვრული ტექსტების პოპულარიზაციის მიზნით შეიქმნა. 2013 წლიდან მოყოლებული, ჩვენ ვაგროვებთ ახალგაზრდა თუ გამოცდილ მწერალთა შიშებს, ამ მწერლებისავე ფანტასტიკურ იდეებთან ერთად; მათ პროზად ვაქცევთ და წიგნად გამოვცემთ. ამიტომ ეს შიშებით მდიდარი წელი არავითარ შემთხვევაში არ უნდა გაგვეცდინა; თუმცა, მოგვიწევდა, რომ არა ჩვენი ფესტივალისადმი მწერალთა სახლის ინტერესი, რომელსაც დიდი მადლობა ეკუთვნის ამ ისტორიულ შენობაში ჩვენი გულთბილი მასპინძლობისთვის.
ასევე, მადლობა სულაკაურის გამომცემლობას, რომელმაც უკვე მეორე კრებულის გამოცემა იტვირთა. მისი მხარდაჭერის გარეშე ჩვენი ფესტივალის ჩატარება შეუძლებელი იქნებოდა.
ეს „ინსომნიის“ რიგით მეექვსე კრებულია და ის ძრავებაგუგუნებული კოსმოსური ხომალდივით გელის, როგორც ძვირფას მგზავრს, რათა უცნაურ სამყაროებში შეგიძღვეს.
ზაზა კოშკაძე
2020 წელი
ჩუქება
