რაც უფრო ქაოსური და აპოკალიფსურია რეალობა, მით უფრო დიდია ჟანრული ტექსტების მნიშვნელობა. დღეს სამეცნიერო ფანტასტიკისა და საშინელებათა ჟანრის წიგნები გზამკვლევებად იქცნენ კოლაფსის პირას მყოფი სამყაროს ხალხებისთვის. ამიტომ წიგნი, რომელიც ახლა ხელში გიჭირავს, მეტია, ვიდრე მოთხრობების კრებული. ის შენი მეგობარია, რომელიც ყველა სამყაროს ყველაზე საშიში საიდუმლოების პირისპირ მდგარს, ხელს მოგკიდებს და განუგეშებს. ეს წიგნი სახიფათო და დაუჯერებელი სამყაროების მორიგი ენციკლოპედიაა, რომელსაც ქართული ჟანრული ლიტერატურის ფესტივალი „ინსომნია“ გთავაზობს. ფესტივალი „ინსომნია“ 2013 წელს დაარსდა და მას შემდეგ ცდილობს ჟანრული ლიტერატურის პოპულარიზაციას ქართველ მკითხველთა შორის. ეს წიგნი 2020 წელს საფესტივალო უძილობისას შეიქმნა და ის, ტრადიციულად, შვიდი ფინალისტის მოთხრობასა და ფობიოგრაფიას აერთიანებს.