Aამერიკელი მწერლის უილა ქესერის რომანი "სიკვდილი არქიეპისკოპოსსაც აკითხავს" XX საუკუნის 100 საუკეთესო "დასავლური რომანისა" და ამერიკული კლასიკური ლიტერატურის სიაშია შეტანილი. ეს ნაწარმოები დაფუძნებულია ისტორიული პიროვნების, ეპისკოპოს ჟან-ბაპტისტ ლემის (ნაწარმოებში ჟან მარი ლატური) ცხოვრებაზე და ასახავს რომის კათოლიკე მისიონერთა მოღვაწეობას მექსიკის ვრცელ ტერიტორიაზე. აქ შთამბეჭდავად არის ასახული ქრისტიანობის გავრცელება მექსიკელ და ინდიელ მოსახლეობას შორის და ყველა ის სირთულე, რისი გადალახვაც უწევთ სარწმუნოებისთვის თავდადებულ მისიონერებს. ავტორი აცოცხლებს ისეთ ცნობილ ისტორიულ პიროვნებებს, როგორებიც არიან: კიტ კარსონი (კოლონისტი, სკაუტი და ჯარისკაცი), მანუელ ანტონიო ჩავესი (ამერიკის არმიის მეომარი და მდიდარი მექსიკელი), რომის პაპი 1831-1846 წლებში გრეგორი XVI და სხვ. ნაწარმოების სათაური - "სიკვდილი არქიეპისკოპოსსაც აკითხავს" - კიდევ ერთხელ გვახსენებს, რომ მნიშვნელობა არ აქვს, ვინ ხარ და რას წარმოადგენ ამქვეყნად, სიკვდილი თითოეული ადამიანის კარს მიადგება და მას თვით ძლიერნი ამა ქვეყნისანიც ვერ დააღწევენ თავს. მთავარია ის, თუ რას უტოვებ შთამომავლობას და რა ღირსეული ქმედებით უკვდავყოფ სამარადისოდ შენს სახელს.