XX საუკუნის პირველი ნახევრის ეგვიპტური პროზის ორი თვალსაჩინო მცირე ფორმატის რომანი - თავფიკ ალ-ჰაქიმის „ჩიტი აღმოსავლეთიდან“ და იაჰია ჰაკკის „უმ ჰაშიმის კანდელი" აღმოსავლურ-დასავლური ურთიერთობების თემაზე შექმნილი პოსტკოლონიური ტექსტებია, სადაც ევროპაში განათლებამიღებული არაბი ახალგაზრდობის ფსიქოლოგიური პრობლემების აღწერის ფონზე შემოდის ახლო აღმოსავლეთისა და ევროპის კულტურული დიალოგის ელემენტები. რომანების მთავარ გმირთა ტრანსფორმაციისა და თვითგანვითარების გზა კარგად წარმოაჩენს ამ ორი კულტურის თანაარსებობის სივრცის საზღვრების გაფართოებასა და მათი ერთმანეთთან დაპირისპირებიდან დიალოგურ, ე.წ. ჰიბრიდულ კულტურულ სივრცეში გადასვლას, სიყვარული და სასიყვარულო სიუჟეტი კი ამგვარი დიალოგის შუქ-ჩრდილების ყველაზე უკეთ წარმოდგენის გზაა. ამ რომანებში ყველაფერი ერთმანეთს გადაჯაჭვულია - ისტორია და აწმყო, დასავლეთი და აღმოსავლეთი, სიყვარული და სიძულვილი, რწმენა და ურწმუნობა, განათლება და ცრურწმენები, იმედი და იმედგაცრუება... ეს მაშრიყ-მაღრიბული სერპანტინი კი გამომცემლობა „წიგნები ბათუმში" აღმოსავლური ბიბლიოთეკის სერიით სულ ახლახან გამოცემულ მორიგ წიგნშია, რომელიც ქართველ მკითხველს XX საუკუნის ეგვიპტური ლიტერატურის კლასიკად ქცეულ ამ ორ ავტორთან - თავფიკ ალ-ჰაქიმთან და იაჰია ჰაკკისთან შესახვედრად ეპატიჟება. აღმოსავლური ბიბლიოთეკის სერიის რედაქტორი გიორგი ლობჟანიძეა, წიგნის მთარგმნელი - დარეჯან გარდავაძე, წარდგენა კი მოხდება „ორიენთალ ქლაბში“, რომელიც აღმოსავლურ-დასავლური შეხვედრების უცვლელი მასპინძელია.