მკითხველმა, რომელმაც ჩემი წინა ნაშრომები - წიგნები გულდასმით წაიკითხა, დარწმუნებული ვარ, მიიღო ის „საბაზისო“ ცოდნა, რომელიც საჭიროა პირველი ნაბიჯების გადასადგმელად კაცობრიობის ისტორიაში ყველაზე უძველესი საძმოს, მასონური ორდენის არსის გასაგებად.
ამ წიგნებში წარმოდგენილია მასონური საძმოს, თანამედროვე ლოჟების წარმოშობის სხვადასხვა თეორია, ამ ლოჟების განვითარების ისტორია, ორდენში გამოყენებული სიმბოლიკის მოკლე ახსნა, თავისუფალ ქვისმთლელთა რიტუალისა და ფილოსოფიის საფუძვლები, ქართველი მასონის დამოკიდებულება სახელმწიფოს განვითარების რიგ საკითხებთან, აგრეთვე, წარმოგიდგინეთ ანტი-მასონური კამპანიის რიგი თეზისებიც, მასონური ორდენის წინააღმდეგ ყველაზე ხშირად გამოყენებული ბრალდე-ბები და მრავალი სხვა, მკითხველისთვის საინტერესო ფაქტები, შეფასებები და რაც მთავარია, ქართველი მასონის პირადი გამოცდილება, თუ რატომ და როგორ გადავწყვიტე ორდენში გაწევრიანება, როგორი იყო ის გზა ორდენის პირველ საფეხურამდე - ინიცირებამდე, როგორი იყო შემდგომი გზა ჩრდილოეთიდან სამხრეთით და დასავლეთიდან აღმოსავლეთისენ. წინამდებარე ნაშრომში შევეცდები ორდენი სხვა კუთხით, სხვა პრიზმაში წარმოგიდგინოთ. ყურადღებას გავამახვილებ მასონობისა და ეზოთერიკის, მაგიის თუ ეგზოთერიკის ურთიერთობებზე ამასთანავე, ხაზგასმით აღვნიშნავ, რომ ეს სწავლებები თუ მიმართულებები არ არის მასონური ორდენის ნაწილი, ამასთან, მათი განვითარების ისტორია, ხშირ შემთხვევაში, ინდივიდი ადამიანების გამო, გადაკვეთილა და არა ერთხელ... ასევე მოკლედ ვისაუბრებ ეზოთერიკის არსზე, ჰერმეტიკულ ფილოსოფიაზე და სხვადასხვა ტიპის ორდენზე თუ საზოგადოებაზე, რომელთა ნაწილი ისტორიულ კავშირშია მასონობასთან და ნაწილს შეცდომით აიგივებენ ჩვენს ორდენთან.
როგორც ზემოთ მოგახსენეთ, ეს ნაშრომი ნაწილია იმ ციკლისა, რომელიც მე დავგეგმე, რომ ფართო მკითხველს წარმოვუდგინო. მზადდება სხვადასხვა ნაშრომი, რომლებშიც წარმოგიდგენთ მასონობის და ოკულტიზმის ურთიერთობებს, მარტინისტთა ორდენის განვითარების ისტორიასა და ფილოსოფიას, საინტერესო პარალელებს გავავლებთ კომუნიზმის და ფაშიზმის ოკულტურ საფუძვლებთან, ვისაუბრებთ სხვადასხვა არაორდინა- რულ ადამიანზე, მათ ცხოვრებაზე, საქმიანობაზე და მემკვიდრეობაზე, როგორებიც იყვნენ ლუი - კლოდ დე სენ მარტენი, ვილერმოზი, გურჯიევი, კროული, გრაფ კალიოსტრო, მადამ ბლავაცკაია, ადოლფ ჰიტლერი, იოსებ სტალინი, შტაინერი და მრავალი სხვა.