ნაწარმოების მთავარი გმირები თბილისელი გია და ციმბირელი (ალთაის მხარე, ქალაქი ბარნაული) ტანია არიან. ტანია მესამე წელია თბილისში დასასვენებლად ჩამოდის გიას ბიძაშვილ ანასთან ერთად. ღმერთი სამობითაა და ამჯერად გიას და ტანიას შორის ივლისივით ცეცხლოვან რომანს წინ ვეღარაფერი უდგება. ხმაურიანი შეხვედრები საბურთალოზე, გაგარინის ქუჩის სასტუმროს ნომრებში მიმდინარეობს. პირველი მთავარი კონფლიქტი რუსეთის დუმის „მართლმადიდებელი კომუნისტი“ დეპუტატის, ვინმე გავრილოვის თბილისში ვიზიტით და საქართველოს პარლამენტის თავმჯდომარის სავარძელში ჩაჯდომით იწყება, რასაც რუსთაველზე დიდი ვნებათაღელვა და პროტესტი მოყვება. ამ ფონზე, ტანია გლდანის სახლში მყარად იკეტება და შეშინებული მხოლოდ სამშობლოში დაბრუნებაზე ფიქრობს. სახალხო დიპლომატიის გაღრმავების ინიციატივას ისევ ჩვენი გმირი გია იღებს საკუთარ თავზე, თანაც წარმატებით. სად შეიძლება ეს მოხდეს, თუ არა ქართული ღვინის ფესტივალზე მუზეუმში ღია ცის ქვეშ.