საჯარო მმართველობა არის ადმინისტრაციული სამართლის ცენტრალური ინსტიტუტი. ადმინისტრაციული სამართალი არის საჯარო მმართველობის სამართალი. ადმინისტრაციული სამართლის არსის დასადგენად აუცილებელია საჯარო მმართველობის ცნების განსაზღვრა. ადმინისტრაციული სამართლის მეცნიერებაში გხვდება მცდელობა ასეთი ცნების ჩამოყალიბების. მიზნის მიღწევის ორი გზა არსებობს: საჯარო მმართველობის ცნების დეფინიცია ან მისი შინაარსობრივი აღწერა. იურიდიულ ლიტერატურაში გამოთქმული მოსაზრების თანახმად, შეუძლებელია საჯარო მმართველობის (სრულყოფილი) დეფინიცია, შესაძლებელია მისი აღწერა მისთვი დამახასიათებელი კრიტერიუმების და ნიშნების გამოყენებით. სრულყოფილი დეფინიციის ჩამოყალიბების სირთულე გამომდინარეობს საჯარო მმართველობის რადიკალურად განსხვავებული სფეროებით, რომელიც შეუძლებელია მოექცეს ერთიან განმარტებაში.
საქართველოს კონსტიტუციის თანახმად, სახელმწიფო ხელისუფლება ხორციელდება საკანონმდებლო, აღმასრულებელი და სასამართლო ხელისუფლების მიერ. აღმასრულებელი ხელისუფლება არის საჯარო მმართველობის განმახორციელებელი ხელისუფლების შტო.