ამ რომანში მოთხრობილი ამბავი, ერთი საინტერესო ოჯახის რეალური ისტორიაა, რომელიც ჩემთვის ძალიან დიდი ხნის წინ გახდა ცნობილი. წლების განმავლობაში, ჩემს გონებაში წარმოდგენილი ეს სიუჟეტი მოსვენებას არ მაძლევდა, მაგრამ ამის პარალელურად მქონდა განცდა, რომ მე მას ვერ მოვერეოდი. ყველაფერი გადაწყვიტა ერთმა მომენტმა, როდესაც სრულიად შემთხვევით შევხვდი ყავარჯნებზე შემდგარ კაცს, რომელსაც მანქანებით გადატვირთული ქუჩის გადაკვეთაში მივეხმარე. ეს ფიზიკურად განადგურებული ადამიანი, საბჭოთა უშიშროების ორგანოების მიერ იმ სპეცპოლკში გაწრთვნილი აღმოჩნდა, სადაც ერთ დროს ამ წიგნის მთავარი პერსონაჟი ანტონ სავიჩევი მსახურობდა. თუ რას ასწავლიდნენ იქ, როგორ მოქმედებებში იღებდნენ მონაწილეობას იმ პოლკში გამოზრდილი ე.წ. იმპერიის ჯარისკაცები და როგორ გამოიყურებოდა სულიერი თვალსაზრისით ჩამოწერილი ეს სპეცაგენტი, ამაზე ბოლოს გვექნება საუბარი. მანამდე კი, კვალში მივყვეთ რომანის გმირის ცხოვრებას, რომელიც გვამცნობს, ვისი ეშინოდა ყველაზე მეტად საბჭოთა კავშირს და რა მეთოდებით უსწორდებოდა ურჩ ინტელექტუალებსა და თავისუფალი ბუნების ადამიანებს.