მისი მენტალური ერთობის ფსიქოლოგიური კანონი რას წარმოადგენს ბრბო ფსიქოლოგიური თვალსაზრისით - ინდივიდუალთა რაოდენობრივად დიდი შეკრება არ არის საკმარისი ბრბოს ჩამოსაყალიბებლად - ფსიქოლოგიური ბრბოს განსაკუთრებული მახასიათებლები - ასეთი ბრბოს შემადგენელ ინდივიდუალთა იდეებისა და განწყობის ფიქსირებული მიმართულების შექცევა, და მათი ინდივიდუალობის გაქრობა - ბრბოზე ყოველთვის ის შეხედულებებია გაბატონებული, რომლებსაც ის ვერ აცნობიერებს - გონებრივი აქტივობის გაქრობა და მედულარული აქტივობის გაბატონება - გონებრივ შესაძლებლობათა დაქვეითება და გრძნობათა სრული ტრანსფორმაცია - ტრანსფორმირებული გრძნობები შესაძლოა ბრბოს შემადგენელ ინდივიდუალთა განცდებზე უკეთესი ან უარესი იყოს - ბრბო ისევე მარტივად იქცევა გმირად, როგორც ბოროტმოქმედად.
ჩვეულებრივი გაგებით სიტყვა „ ბრბო “ ნიშნავს ნებისმიერი ეროვნების, პროფესიისა თუ სქესის ადამიანთა შეკრებას მიუხედავად მათი თავშეყრის მიზეზისა. ფსიქოლოგიური თვალსაზრისით სიტყვა „ ბრბო “ ფრიად განსხვავებული მნიშვნელობის მატარებელია. მოცემულ კონკრეტულ გარემოებებში, და მხოლოდ ამ გარემობებში, ადამიანთა თავყრილობა იძენს ახალ მახასიათებლებს, რომლებიც მკვეთრად განსხვავდება მის შემადგენელ ინდივიდთა მახასიათებლებისგან. თავყრილობის შემადგენელ პიროვნებათა აზრები და განცდები ერთ მხარეს არის მიმართული, ხოლო მათი ცნობიერი პიროვნება ქრება. ყალიბდება კოლექტიური ფსიქიკა, უდაოდ დროებითი ხასიათის, მაგრამ ცხადად განსაზღვრული მახასიათებლებით. ამგვარად თავყრილობა იქცევა იმად, რასაც მე, უკეთესი განსაზღვრების არარსებობის პირობებში, ორგანიზებულ ბრბოს ვუწოდებ ან, თუ ამ ცნებას ანიჭებთ უპირატესობას - ფსიქოლოგიურ ბრბოს. ყალიბდება ერთი არსება, რომელიც ბრბოს მენტალური ერთობის კანონს ექვემდებარება.
ცხადია, რომ ორგანიზებული ბრბოს მახასიათებლების შეძენა მხოლოდ იმ ფაქტის გამოისობით არ ხდება, რომ ინდივიდები შემთხვევით აღმოჩნდებიან ერთმანეთის გვერდით. საჯარო ადგილას განსაზღვრული მიზნის გარეშე შემთხვევით შეყრილი ათასი ინდივიდი არანაირად არ წარმოადგენს ბრბოს ფსიქოლოგიური თვალსაზრისით. ბრბოს ასეთი განსაკუთრებული მახასიათებლების შესაძენად აუცილებელია კონკრეტულ გამომწვვ მიზეზთა გავლენა, რომელთა ბუნება ჩვენ ახლა უნდა განვსაზღვროთ.
ცნობიერი პიროვნების გაქრობა და, გრძნობების და აზრების შეცვლა კონკრეტული მიმართულებით, რაც ჩამოყალიბების პროცესში მყოფი ბრბოს ძირითადი მახასიათებლებია, აუცილებელი წესით არ საჭიროებს ინდივიდთა გარკვეული რაოდენობის ერთდროულ ყოფნას ერთ წერტილში. ათასობით იზოლირებულმა პიროვნებამ გარკვეული ძლიერი ემოციის, მაგალითად, დიდი ეროვნული მოვლენის, გავლენით კონკრეტულ ვითარებაში შესაძლოა ფსიქოლოგიური ბრბოს მახასიათებლები შეიძინოს. ასეთ დროს მათი შემთხვევით ერთად შეკრება საკმარისი იქნებოდა, რომ მათი მოქმედებები ასეთი ბრბოსთვის დამახასიათებელი მახასიათებლებით წარმართულიყო. გარკვეულ შემთხვევებში ათი ადამიანიც კი აყალიბებს ფსიქოლოგიურ ბრბოს, რაც შესაძლოა არ მოხდეს, თუ ასობით ადამიანია ერთად თავმოყრილი შემთხვევის გამოისობით. მეორეს მხრივ, მთელი ერი, თუმცა ხილულ აგლომერაციას ადგილი შესაძლოა არც ჰქონდეს, გარკვეული ქმედებების გავლენით ბრბოდ იქცევა.
როგორც კი ერთხელ ჩამოყალიბდება, ფსიქოლოგიური ბრბო იძენს კონკრეტულ, წინასწარ, მაგრამ განსაზღვრებას დაქვემდებარებულ ძირითად მახასიათებლებს. ამ ძირითად მახასიათებლებს ესაზღვრება ცალკეული მახასიათებლები, რომლებიც ბრბოს შემადგენელ ელემენტთა შესაბამისად იცვლება და შესაძლოა მისი მენტალური სტრუქტურა შეცვალოს. შესაბამისად, ფსიქოლოგიური ბრბო კლასიფიცირებას ექვემდებარება; როდესაც ჩვენ ამ საკითხით დავკავდებით, ვიხილავთ, რომ ჰეტეროგენული ბრბო ანუ ბრბო, რომელიც არაერთგვაროვანი ელემენტებისგან შედგება, ატარებს კონკრეტულ მახასიათებლებს, რომლებიც საზიაროა ჰომოგენურ ანუ მონათესავე ელემენტებისგან შემდგარ ბრბოსთან (სექტა, კასტა და კლასები) - ამ საერთო მახასიათებლების გვერდიგვერდ კი ვიხილავთ თავისებურებებს, რომლებიც საშუალებას გვაძლევენ ორი სახის ბრბო ერთმანეთისგან განვასხვაოთ.
სანამ ბრბოთა სხვადასხვა კატეგორიებით დავკავდებოდეთ, პირველ რიგში ის მახასიათებლები უნდა შევისწავლოთ, რომლებიც ყველასათვის საერთოა. ბუნებისმეტყველის მსგავსად უნდა ვიმოქმედოთ, რომელიც ოჯახის ყველა წევრის ძირითადი მახასიათებლების აღწერით იწყებს და მხოლოდ შემდეგ გადადის განსაკუთრებულ თვისებებზე, რომლებიც ამ ოჯახის შემადგენელი გვარისა და ტიპის განსხვავების საშუალებას გვაძლევს.
ბრბოს ფსიქიკის ზუსტი აღწერა იოლი არ არის, რადგან მისი ჩამოყალიბება არა მხოლოდ ეროვნულობისა და შემადგენლობის მიხედვით ხდება, არამედ იმ გამომწვევი მიზეზების ბუნებისა და ინტენსივობის შესაბამისად, რომლებსაც ბრბო ექვემდებარება. აქვე უნდა ითქვას, რომ იგივე სირთულეს ვხვდებით პიროვნების ფსიქოლოგიური შესწავლისას. მხოლოდ რომანებში გაივლიან ადამიანები მთელ ცხოვრებას უცვლელი ხასიათით. ხასიათის ერთგვარობის მოჩვენებითობას გარემოს ერთგვარობა ქმნის. სხვა