რომანის ძირითადი თემა სიკეთე, ურთიერთპატივისცემა და სიყვარულია. ჩემი აზრით იგი სტიმულს მისცემს და იმედს ჩაუსახავს მათ, ვისაც არ სჯერა, ან ეჭვი ეპარება, რომ ერთი ნახვით შეყვარება არსებობს და პირველი ხელმოცარული სიყვარულის შემდეგ შესაძლებელია კიდევ ეწვიოთ ეს დიადი გრძნობა. ნაწარმოების მთავარი პერსონაჟები, მომხიბლავი, ვაჟკაცური ბუნების, განათლებული, კეთილშობილი, სიკეთისა და სიყვარულის დიდი უნარით დაჯილდოებული ძმები ელიზბარ და ანზორ ჩოხელები არიან, რომლებიც, დარწმუნებული ვარ, ჩემს ერთგულ მკითხველს ემახსოვრება წინა რომანებიდან, თუმცა იქ ისინი მოკრძალებულად ფიგურირებენ მეორე პლანში. რომანში მოქმედება დღევანდელ თბილისში ხდება და იწყება მაშინ, როცა ძმების ცხოვრებაში და ოჯახში სრულიად მოულოდნელად, შუაღამისას, ახალგაზრდა, ლამაზი ქალი შედის, რომელსაც დაცვა და მფარველობა სჭირდება. შუაღამის სტუმარი, საინტერესო ელფერს შესძენს და მთლიანად შეცვლის მათ ყოველდღიურ, წყნარ ცხოვრებას.