ეს წიგნი
ამ წიგნით ჟურნალი „Liberal” იწყებს რუბრიკას „ბილიკები”, რომლის მიზანია, უფრო მკაფიოდ და ნათლად წარმოაჩინოს საზოგადოების წინაშე კვლევის ის მნიშვნელოვანი მიმართულებები, რომელთა გაღრმავებისა და განვითარებისათვის ჟურნალი ძალისხმევას არ იშურებს და აქტიურად თანამშრომლობს არაერთ სახელოვან მკვლევართან. კარდინალ კარლო მარია მარტინისა და უმბერტო ეკოს დიალოგი, რაც წიგნის პირველ ნაწილს წარმოადგენს, 1995 წლის 22 მარტს „Liberal”-ის პირველ ნომერში დაიწყო და სამთვიანი ინტერვალებით იბეჭდებოდა. ამ საჯარო მიმოწერის რვა წერილი მათი ფაქტობრივი დაწერის მიხედვითაა დათარიღებული.
მკითხველის ინტერესმა და პრესის გამოხმაურებამ, რომელიც ამ მიმოწერაში წამოჭრილმა საკითხებმა გამოიწვია (განსაკუთრებით უკანასკნელმა - ყველაზე ვრცელმა და საფრთხილომ), გადაგვაწყვეტინა, კამათში ისეთი ადამიანებიც ჩაგვერთო, რომელთაც გარკვეულწილად ეხებოდა, თუმცა სხვადასხვაგვარად, ეკოსა და მარტინის დებატებში წამოჭრილი პრობლემები. ამ მიზნით მოვიწვიეთ ორი ფილოსოფოსი, ორი ჟურნალისტი და ორი პოლიტიკოსი. მათი „ვარიაციები” 1996 წლის მარტში, ჟურნალის მე-12 ნომერში, დაიბეჭდა.
დაბოლოს, კარდინალ მარტინის ვთხოვეთ ამ დისკუსიის დასრულება. ეს არც დასკვნაა და არც სინთეზი (რაც სრულიად შეუძლებლად მიგვაჩნია), ეს უფრო თემის „განახლებაა”, ერთგვარი განმარტება რამდენიმე საკვანძო საკითხის უკეთ წარმოჩენისთვის, ან თუნდაც - რატომაც არა - ახალი დასაწყისი.
აქ წარმოდგენილი წერილები უცვლელად იბეჭდება. რედაქციამ ისინი მხოლოდ ახლებურად დაასათაურა და ჩაასწორა ტექსტებში არსებული მცირეოდენი კორექტურული შეცდომები.