ჯონ გოლზუორთი (1867-1933)
გამოჩენილი ინგლისელი მწერალი ჯონ გოლზუორთი 1867 წლის 14 აგვისტოს, ამჟამად ლონდონის ტერიტორიაში შემავალ ქალაქ კინგსტონ-აპონ-თემზში, შეძლებულ ოჯახში დაიბადა. იურისტი და კომპანიების მმართველი მამის კვალზე, სამართლის სწავლას მიჰყო ხელი პრივილეგირებულ „ჰეროუს“ სკოლაში, შემდგომ კი - ოქსფორდის უნივერსიტეტის „ნიუ კოლეჯში“.
მიუხედავად ამისა, ამ პროფესიაში საკუთარი თავი ვერ დაინახა და თუმცა საოჯახო ბიზნესში (საზღვაო გადაზიდვების სფეროში) გასარკვევად წავიდა სამოგზაუროდ, ეს ფაქტობრივად, ცხოვრების გასაცნობად გამოიყენა. ავსტრალიიდან მომავალი, შეხვდა და დაუმეგობრდა ჯოზეფ კონრადს, რომელიც დაარწმუნა, რომ უნდა გამოექვეყნებინა სამოგზაურო ნოველები, რომლებსაც ის, გემის კაპიტნის თანაშემწე, თავისთვის წერდა. ამგვარად, მომავალი დიდი მწერალი ასევე მომავალში მწერლის ლიტერატურული კარიერის დაწყების ინიციატორი აღმოჩნდა.
თავად გოლზუორთის კარიერა 1897 წელს დაიწყო - ნოველების კრებულის, „ოთხი ქარის მონაბერი“ გამოცემით. მას მოჰყვა რომანი „ჯოსლინი“, რომელიც კონრადმა „თავისი ტრაგიზმით პოეტური“ უწოდა. ეს წიგნები, ისევე როგორც რამდენიმე მომდევნო ნაწარმოები, გოლზუორთიმ „ჯონ სიჯონის“ ფსევდონიმით გამოუშვა.
„ფორსაიტების საგის“ პირველი რომანი - „მესაკუთრე“ 1906 წელს გამოვიდა. საერთო ჯამში, ამ ტრილოგიაზე მუშაობას გოლზუორთიმ 15 წელი დაუთმო.
საინტერესოა, რომ თავდაპირველად ყველაზე დიდი პოპულარობა გოლზუორთის დრამატურგიამ მოუტანა, თუმცა დღეს მთელი მსოფლიოს მკითხველებისთვის მას, როგორც „ფორსაიტების საგის“ ავტორს, ისე იცნობენ.
სპეციფიკურ და მკითხველებში ნაკლებად პოპულარულ - პიესის ჟანრზე რომ არაფერი ვთქვათ, გოლზუორთის ნოველებიც ნაკლებადაა ცნობილი, თუმცა მისი შემოქმედების უმნიშვნელოვანეს ნაწილს წარმოადგენს. სწორედ ამიტომ, მისი „რჩეულის“ ოთხტომეულს რჩეული ნოველების ტომით ვიწყებთ.
ჯონ გოლზუორთის ბიოგრაფიიდან აღსანიშნავია რამდენიმე ფაქტი, რომელიც უნდა გამოვყოთ. ესენია: ათწლიანი რომანი მისი ბიძაშვილის ყოფილ ცოლ ადა პირსონთან, რომელზეც 1905 წელს დაქორწინდა; პირველი მსოფლიო ომის დროს საფრანგეთში სამხედრო ჰოსპიტალში სანიტრად მუშაობა, პენ-კლუბის დაარსება (მწერალ ქალ კეთრინ ემი დოუსონ-სკოტთან ერთად) და სათავეში ჩადგომა 1921 წელს; 1929 წელს მისთვის „ღვაწლმოსილთა ორდენში“ მიღება. აქვე დავძენთ, რომ მისი მეუღლე ადა პირსონი, გოლზუორთის ბევრი ნაწარმოების პერსონაჟი ქალების პროტოტიპად გვევლინება.
1932 წელს, უკვე მძიმედ დაავადებულ ჯონ გოლზუორთის ლიტერატურის დარგში ნობელის პრემია მიენიჭა. ტვინის სიმსივნისგან გაუსაძლისი ტკივილებით დატანჯული მწერალი ჯილდოს მისაღებად სტოკჰოლმში ვერ გაემგზავრა.
იმ დღიდან მან სულ რაღაც ექვსი კვირა იცოცხლა. მწერლის ნების შესაბამისად, მისი ნეშტი კრემირებული იქნა, ხოლო ფერფლი თვითმფრინავიდან, ინგლისის სამხრეთ-აღმოსავლეთ სანაპიროზე, საუთ-დაუნის ბორცვების თავზე გადმოაბნიეს.