უილიამ თეკერეი (1811-1863) გამოჩენილი ინგლისელი მწერალი-სატირიკოსი, უილიამ თეკერეი დაიბადა ინდოეთის ქალაქ კალკუტაში, სადაც მისი ბაბუა და მამა მსახურობდნენ. ჯერ კიდევ პატარა იყო, როცა სამშობლოში, ლონდონში დაბრუნდა. 18 წლის ასაკში კემბრიჯის უნივერსიტეტის სტუდენტი გახდა, თუმცა მხოლოდ ერთი წელი ისწავლა. უნივერსიტეტში გამოსცემდა ჟურნალს "სნობი", რაც ცხადყოფს, რომ სნობების სახე და პრობლემა იმთავითვე მისი ინტერესის ობიექტი იყო. ბავშვობიდანვე თანატოლებში დიდი იუმორის გრძნობით გამოირჩეოდა და მახვილგონივრულ პაროდიებს წერდა.
1830 წელს, კემბრიჯში სწავლის მიტოვების შემდეგ თეკერეი სამოგზაუროდ კონტინენტურ ევროპაში გაემგზავრა. ცხოვრობდა ვაიმარში, შემდეგ – პარიზში, სადაც მხატვარ რიჩარდ ბონინგტონის ხელმძღვანელობით ხატვის სწავლას მიჰყო ხელი. მართალია, ეს სფერო ძირითად საქმიანობად არ გაუხდია, სამაგიეროდ საკუთარ რომანებს ურთავდა ილუსტრაციებს, რომლებიც პერსონაჟების კარიკატურულად გადმოცემის თეკერეის უნარს ცხადყოფს.
სრულწლოვანების მიღწევისას, უილიამმა მიიღო მემკვიდრეობა – დაახლოებით 500 გირვანქა სტერლინგი წლიური შემოსავალი. ეს თანხა მალე დახარჯა, ნაწილი - კარტის თამაშის შედეგად, ნაწილი – ორი ლიტერატურული გაზეთის გამოცემაზე, რომლებმაც წარმატება ვერ მოუტანა.
1836 წელს ფსევდონიმით "თეოფილ ვაგსტაფი" გამოსცა წიგნი, სახელწოდებით "ფლორა და ზეფირი", რომელიც მსახიობთა წყვილის - მარია ტალიონისა და მისი პარტნიორის - ალბერის კარიკატურების სერიას წარმოადგენდა.
1837 წელს მწერალი დაოჯახდა, მაგრამ ამ ქორწინებას მისთვის ტკივილის გარდა არაფერი მოუტანია: ცოლის ფსიქიკური სნეულების გამო საბოლოოდ მისი იზოლირება გახდა საჭირო.
უილიამ თეკერეის პირველი რომანი "ქეთრინი" ჟურნალში Frazer’s Magazine 1839-1840 წლებში ქვეყნდებოდა. ეს ნაწარმოები საგანგებოდ ჩვენი სერიისთვის, ქართულ ენაზე პირველად ითარგმნა. ამ და კიდევ ერთ ჟურნალთან - The New Monthly Magazine - ავტორი ფსევდონიმით "მაიკლ ტიტმარში" წლების მანძილზე თანამშრომლობდა. იმ დროს მიღებული წესისამებრ, უმეტესად ფსევდონიმით იბეჭდებოდა და მხოლოდ "ამაოების ბაზარი" გამოაქვეყნა საკუთარი სახელით.
1847-1848 წლებში დღის სინათლეზე გამოსულმა ამ ნაწარმოებმა ავტორს სახელი გაუთქვა. თეკერეი ამ რომანს წინასწარ შემუშავებული გეგმის გარეშე წერდა: რამდენიმე პერსონაჟი ჩაიფიქრა და მათ ირგვლივ სხვადასხვა მოვლენას აჯგუფებდა იმ მიზნით, რომ მკითხველის რეაქციისდა კვალობაზე, ჟურნალში მისი გამოქვეყნების გაგრძელებაც ყოფილიყო შესაძლებელი და შეწყვეტაც.
"ამაოების ბაზარს" მოჰყვა რომანები: "პენდენისი", "ესმონდი", "ნიუკომები". 50-იანი წლების მეორე ნახევარში თეკერეიმ ჯერ ევროპაში, მერე კი ამერიკაშიც საჯარო ლექციებით გამოსვლას მიჰყო ხელი, რაზეც ამ სფეროში დიკენსის მიერ მიღწეულმა წარმატებებმა წააქეზა, ოღონდ, მისგან განსხვავებით, თეკერეი მსმენელებს არა რომანებს, არამედ ისტორიულ-ლიტერატურულ ნარკვევებს სთავაზობდა. ამ ლექციებისგან საბოლოოდ, ორი წიგნი შედგა: "XVIII საუკუნის ინგლისელი იუმორისტები" და "ოთხი ჯორჯი".
1957-1859 წლებში თეკერეი "ესმონდის" გაგრძელებას - "ვირჯინიელებს" აქვეყნებდა. ამავე პერიოდში ჟურნალ "კორნჰილის" რედაქტორ-გამომცემელი იყო. რომანი "დენი დიუვალი" გამოუქვეყნებელი დარჩა. 1863 წლის 24 დეკემბერს ინსულტისგან გარდაიცვალა.