ნაწილი I - თავი 1
ალექსს,
გეპატიჟები ჩემ მეშვიდე დაბდღეზე სამშაბათს, 8 აპრილს, ჩემს სახლში. ფოკუსები გვექნება და შეგიძლია 2-ზე მოხვიდე. 5 საათზე დამთავრდება. იმედია, მოხვალ.
შენი საუკეთესო მეგობარი როზისგან
როზის,
კი, მოვალ შენ დაბდღეზე ოთხშაბათს.
ალექსისგან
ალექსს,
ჩემი დაბდღე სამშაბათსაა და არა ოთხშაბათს. სენდის მოყვანა არ შეიძლება, დედიკომ თქვა, სუნიანიაო.
როზისგან
როზის,
არ მაინტერესებს შენი სულელი დედა რას ამბოს სენდის წამოსვლა უნდა.
ალექსისგან
ალექსს,
შენ თვითონ ხარ სულელი. ძაღლის მოყვანა არ შეიძლება. ბუშტებს დახექთავს.
როზისგან
როზის,
მაშინ არ მოვალ.
ალექსი
ალექსს,
ნუ მოხვალ.
როზი
ძვირფასო მისის სტიუარტ,
შემოვიარე, რომ ორი სიტყვა მეთქვა ჩემი ქალიშვილის, როზის, დაბადების დღის შესახებ, რომელიც 8 აპრილსაა. სამწუხაროდ, შინ არ დამხვდით. მოგვიანებით კვლავ შემოვივლი. იმედია, ლაპარაკს მოვახერხებთ.
მგონი, ამ ბოლო დროს ალექსსა და როზის რაღაც პრობლემა აქვთ. ვფიქრობ, ერთმანეთს აღარ ელაპარაკებიან. იმედია, შევხვდებით და თქვენს აზრსაც მოვისმენ. როზის მართლა ძალიან გაუხარდება, თუ ალექსი მის დაბადების დღეზე მოვა.
სულმოუთქმელად ველი ამ პატარა, მომხიბლავი ახალგაზრდის დედის გაცნობას!
შეხვედრამდე,
ელის დანი
როზის,
დიდი სიამოვნებით მოვალ შენ დაბადებისდღეზე მომავალ კვირას. მადლობა, მე და სენდი რომ დაგვპატიჟე.
შენი მეგობრი ალექსი
როზის,
მადლობა კარგი დღისთვის წვეულებაზე. ვწუხვარ, რომ სენდიმ ბუშტები დახექთა და შენი ტორტი შეჭამა. მშიერი იყო, რადგან დედა ამბობს, ყველა ნარჩენს მამა ჭამსო. ხვალ სკოლაში გნახავ.
ალექსი
ალექსს,
მადლობა საჩუქრისთვის. სენდის რაც შეეხება, არაუშავს. დედამ თქვა, მაინც ახალი ხალიჩა მინდოდაო. მამა კი ცოტათი გაბრაზებულია. მან თქვა, ძველიც მშვენიერიაო, მაგრამ დედა ამბობს, რომ სახლში ფუს სუნი დგას.
შეხედე მის ქეისის ცხვირს. ყველაზე დიდი ცხვირია, რაც კი მინახია. ჰა. ჰა.
როზი
როზის,
ჰო, თანაც ცინგლები სცვივა. ყველაზე მახინჯი უცხოპლანეტელია, რაც კი მინახია. მგონი პოლიციას უნდა ვუთხრათ, რომ უცხოპლანეტელი მასწავლებელი გვყავს, რომელსაც სუნთქვის დროს საშინელი სუნი ასდის და...
ძვირფასო მისტერ და მისის სტიუარტ,
მოხარული ვიქნები, თუ შევხვდებით და განვიხილავთ ალექსის განვითარებას სკოლაში. მინდა გესაუბროთ მისი ქცევების ცვლილებაზე და იმაზე, თუ როგორ საუბრობს წერილებით გაკვეთილების დროს. ძალიან დავაფასებ, თუ სკოლაში დარეკავთ და თქვენთვის მისაღებ დროზე შევთანხმდებით.
პატივისცემით,
მის ქეისი
ალექსს,
საშინელებაა, კლასში რომ ერთად აღარ ვსხედვართ. იძულებული ვარ, აყროლებული სტივენის გვერდით ვიჯდე, რომელიც ჯერ ცხვირში იყოფს თითებს, მერე კი პირში. გულისამრევია. რა თქვეს დედაშენმა და მამაშენმა მის დიდცხვირა უცხოპლანეტელზე?
როზისგან
როზის,
დედას ბევრი არაფერი უთქვამს. იცინოდა. არ ვუცი, რატომ. ვუცი, რომ ძალიან მოსაწყენია წინ ჯდომა. მის ქეისი სუნს მაფრქვევს. უნდა წავიდე.
ალექსი
ალექსს,
ვიცი-ს სულ არასწორად წერ. სწორი ფორმაა ვიცი და არა ვუცი(ორიგინალში გამოყენებულია სიტყვები "know" და "no", რომლებიც ერთნაირად გამოითქმის, მაგრამ სხვადასხვაგვარად იწერება. ალექსი ყურადღებას არ აქცევს მართლწერას და მხოლოდ სიტყვის ხმოვანებას ანიჭებს მნიშვნელობას. ქართული ანალოგი ნათლად არ გამოხატავს ამ ნიუანსს.).
როზისგან
როზის,
ბოდიში, მის სურლყოფილებავ, ვუცი, როგორც იწერება.
ალექსისგან
მოგესალმები ესპანეთიდან! ძალიან კარგი ამინდია. ცხელა და მზეა. აუზია დიდი სასრიალოთი. ძალიან მაგარია. მეგობარი გავიჩინე, ჯონი. კარგი ვინმეა. ორ კვირაში გნახავ. უი, მკლავი მოვიტეხე სასრიალოზე. საავადმყოფოში ვიყავი. ნეტა საავადმყოფოში ვმუშაობდე, როგორც ის კაცი, ვინც მკლავი მომირჩინა. ჩემმა მეგობარმა ჯონმა ხელი მომიწერა თაბაშირზე. თუ გინდა შენც მომიწერე, რომ ჩამოვალ.
ალექსი
ალექსს,
მოგესალმები ლუნდინიდან. სურათზე, წინ, ჩემი სასტუმროა. ჩემი ოთახი მიწიდან მეშვიდე სართულზეა, მაგრამ ბარათში მე ვერ დამინახავ. მინდა სასტუმროში ვიმუშავო, როცა გავიზრდები, რადგან უფასო შოკოლადებს იღებ და ადამიანები ისეთი კეთილები არიან, რომ შენ ოთახს ყოველდღე ალაგებენ. ყველა ავტობუსი წითელია, როგორც შენი სათამაშოები, შობას რომ მიიღე. ყველა სასაცილო ხმით ლაპარაკობს, მაგრამ ყველა მომწონს. მეგობარი გავიჩინე, ჯეინი. ერთად დავდივართ საცურაოდ. კარგად.
სიყვარულით, როზისგან
ალექსს,
რატომ არ დამპატიჟე დაბადების დღეზე წელს? ვიცი, რომ კლასიდან ყველა ბიჭი მოდის. გაბრაზებული ხარ ჩემზე?
როზი
ძვირფასო ელის,
ბოდიშს გიხდი ალექსის საქციელის გამო ამ კვირას. ვიცი, როზი ნაწყენია, წვეულებაზე რომ არ მოვიდა და ვერ იგებს, რატომ არ დაპატიჟეს. სიმართლე გითხრა, მე თვითონაც არ მესმის. ვცადე, ალექსს დავლაპარაკებოდი, მაგრამ არ შემიძლია 10 წლის ბიჭის გონებაში შეღწევა.
იქნებ მე და ჯორჯს წაგვეყვანა ორივე სადმე რომელიმე საღამოს ამ კვირაში?
საუკეთესო სურვილებით,
სანდრა სტიუარტი
როზის,
წვეულება არც ისე კარგი იყო. ბევრი არაფერი გამოგიტოვებია. ბიჭები სულელები არიან. ბრაიანმა პიცა ისროლა ჯეიმზის
ჩუქება
