წერილი
თუ ნავმისადგომთან ჩამოხმელეთდები, მაშინვე მოგეგებება ხეობიდან მონაბერი ნიავი. დახუჭე თვალები. ნიავს ფიჭვის სუნი მოაქვს, ნაძვისაც და ამ სურნელს მიჰყევი.
წინ გაჭრილ გზას უნდა დაადგე და დაკეტილ ჯიხურს, სურსათის მაღაზიასა და თეოს საპარიკმახეროს ჩაუარო, მერე კი მდინარის პირს გაუყვე.
თავიდან გზა სწორად მიდის. აქეთ-იქით სახლებიც შეინიშნება. ბოლოში მდგარი სახლის წინ სათხრელი მანქანა გაუჩერებიათ. აქ პეტერი და დედამისი ცხოვრობენ.
რაც უფრო წინ მიიწევ, ირგვლივ ტყესა და უფრო მეტ თოვლს შენიშნავ, სახლები კი კანტიკუნტად თუ შეგხვდება. გზა ვიწროვდება და ციცაბოვდება. თუ აქამდე არასდროს ყოფილხარ აქ, შეიძლება დაეჭვდე კიდეც, ხომ არ დავიკარგეო. არა, სწორ გზას ადგახარ. საგზაო აბრაც ამას გეუბნება.
„გლიმერდალი“ – აწერია აბრას. მაშინღა ხვდები, რომ დანიშნულების ადგილზე მოხვედი.
აბრას რომ ჩაუვლი, ბანაკს მიადგები. ყური მიგდე: არავითარ შემთხვევაში არ მოინდომო ბანაკის ტერიტორიაზე გასეირნება. მერე არ მითხრა, არ გაგიფრთხილებივარო. იქაურობას ჰაგენის გამაჯანსაღებელი ბანაკი ჰქვია და მისი მფლობელი კლაუს ჰაგენია. ისეთი უჟმური ხასიათი აქვს, მოგინდება, სიზმარივით წყალს გააყოლო. ჰაგენს იუმორის იოტისოდენა გრძნობაც არ გააჩნია და ბავშვები ეჯავრება, განსაკუთრებით – ხმაურიანი ბავშვები. ყველაზე მეტად კი ის ბავშვი სძულს, რომელმაც შემთხვევით ერთ-ერთი კოტეჯის ფანჯარა შურდულით ჩაუმსხვრია (უნდა ითქვას, რომ ფანჯარა ვინც გატეხა, არც იმ ბავშვს ეხატება გულზე ჰაგენი, ძილის წინ ნახევრად თვალდახუჭული სულ კოტეჯების დაწიოკებაზე ოცნებობს). მოკლედ, თუ საკუთარ თავისთვის სიკეთე გინდა, ჰაგენის გამაჯანსაღებელ ბანაკს ერიდე.
ბანაკის შემდეგ ტყე იწყება. აქ დათოვლილ ნაძვებს სიმძიმისგან თავები დაუხრიათ. ზოგი ამბობს, ტყე ჯადოსნურიაო. ტყის განაპირას სალის მწვანე სახლი დგას. ამ სახლს ჯადოსნურისა არაფერი სცხია. რომ ჩაუვლი, მისაღები ოთახის ფანჯარაში, ყვავილის ქოთნის უკან, სალის ქიმიურად დახვეულ ლილისფერ თმას შენიშნავ. სალიც უსათუოდ შეგნიშნავს, მას ხომ ვერაფერს გამოაპარებ. ზამთრის კამუფლაჟით შენიღბულმა თაგვივით უჩუმრად რომ გაირბინო მწვანე სახლის წინ, სალი მაინც დაგინახავს. მას შუადღისასაც კი არ სძინავს.
როგორმე სალის მზერას თუ დაუსხლტი, გლიმერდალის მდინარეზე გადებულ ხიდს დაინახავ. იმას რომ გადაივლი და მარჯვნივ გადაშლილ სერზე ახვალ, გუნვალდის ფერმას მიადგები. ამ ფერმიდან მარცხნივ, გორაკს თუკი აუყვები, ტუვასა და მისი ოჯახის ფერმამდეც მიხვალ. მასზე მაღლა მთაზე არავინ ცხოვრობს.
მაშ ასე, უკვე გლიმერდალში ხარ. კეთილი იყოს შენი მობრძანება!
ჩუქება
