ავტორისაგან პირველად იმპერატორის კანვოის (ბადრაგის) შესახებ ამ ოციოდე წლის წინათ აკადემიკოს ამირან ცამციშვილისგან გავიგე, როცა გურულ მოჯირითეებზე დოკუმენტურ ფილმს ვიღებდით (ბატონი ამირანი მოჯირითეების ისტორიის პირველი მკვლევარი და ჩვენი ფილმის კონსულტანტი გახლდათ). მას შემდეგ მრავალმა წყალმა ჩაიარა. მეც ნაბიჯ-ნაბიჯ ვაგროვებდი კანვოის შესახებ მასალებს, რაშიც ძალიან დამეხმარა ჩემი მეგობარი გოგი ანდრონიკაშვილი, რისთვისაც დიდ მადლობას მოვახსენებ.
რუსულ-ქართული რთული, ხანგრძლივი, ტრაგიკული და სისხლიანი ურთიერთობის ფონზე კანვოელთა ისტორია კიდევ ერთი შეხსენებაა იმისა, როცა დაპყრობილი ქვეყნის წარმომადგენლები ნებსით თუ უნებლიეთ დგებოდნენ დამპყრობელი ქვეყნის სამსახურში და თავგამოდებით ემსახურებოდნენ მას. ამ დროს კი, ამდენი ძალისხმევა და ენერგია საკუთარი ქვეყნისთვის რომ შეელიათ, ალბათ დღეს განსხვავებულ სახელმწიფოში ვიცხოვრებდით.
წიგნში გამოყენებულია პარლამენტის ეროვნული ბიბლიოთეკის, "ჯეოსელის" ერთობლივი პროექტის "ციფრული ფოტომატიანისა" და კერძო კოლექციებში დაცული ფოტოები. სამხედრო კონსულტანტია
მამუკა გოგიტიძე – ეროვნულ მეცნიერებათა აკადემიის სამხედრო მეცნიერების საბჭოს წევრი, ისტორიის დოქტორი, პოლკოვნიკი.
გაწეული დახმარებისა და თანადგომისათვის განსაკუთრებული მადლობა მინდა გადავუხადო ჩემს მეუღლეს, ნანას.