***
ოშო რაჯნიში (ბჰაგვან შრი რაჯნიში) დაიბადა ინდოეთში 1931 წლის 11 დეკემბერს. მან 1953 წლის 21 მარტს 21 წლის ასაკში მიაღწია ადამიანური ცნობიერების უმაღლეს მწვერვალს და ეზიარა ჭეშმარიტებას.
1957 წელს მიიღო ფილოსოფიის მაგისტრის წოდება და ჯერ რაიპურის სანსკრიტ-კოლეჯში, შემდეგ კი ჯაბალპურის უნივერსიტეტში მოღვაწეობდა პროფესორის თანამდებობაზე.
1966 წელს მიატოვა უნივერსიტეტი და მთელი დარჩენილი ცხოვრება მიუძღვნა ადამიანთა სულიერ გამოღვიძებას. მან იმოგზაურა მსოფლიოს მრავალ ქვეყანაში, სადაც ლექციებს კითხულობდა.
1974 წელს პუნაში (100კმ ბომბეიდან) დააარსა აშრამი, სადაც მის ყოველდღიურ ლექციებს ესწრებოდნენ მიმდევრები დედამიწის ყველა კუთხიდან. ჩამოყალიბებულ იქნა თერაპიული ჯგუფები, რომლის მოქმედებაში ერთმანეთს ორგანულად ერწყმოდა მედიტაციის აღმოსავლური გაგება და დასავლური ფსიქოთერაპია. სულ ორიოდ წელიწადში აშრამმა მოიპოვა „ადამიანის შინაგანი ზრდისა და თერაპიის ცენტრის” საუკეთესო სახელი მსოფლიოში.
მოწაფეთა (სანიასინთა) რიცხვი კი ყოველწლიურად საგრძნობლად იზრდებოდა და 80-იანი წლების დასაწყისში 100 ათასს გადააჭარბა.
1981 წლის 1 მაისს რაჯნიშმა შეწყვიტა ლექციების კითხვა და შევიდა ე. წ. „გულისმიერი ურთიერთობის მდუმარე ფაზაში”. ამავე პერიოდში მისმა ამერიკელმა მოწაფეებმა ორეგონის შტატში იყიდეს მიტოვებული მიწის ნაკვეთი და საცხოვრებლად მიიწვიეს ბჰაგვანი. აქ დაარსდა სასოფლო-სამეურნეო კომუნა, რომელსაც შემდგომში ეწოდა „რაჯნიშპურამი”. უმოკლეს ხანში ეს მოუვლელი და მიტოვებული მიწის ნაკვეთი იქცა ნაყოფიერ ოაზისად, რომელსაც შეეძლო დამოუკიდებლად დაეკმაყოფილებინა ათასობით ადამიანის მოთხოვნილება. მსგავსი კომუნები დაარსდა იაპონიასა და დასავლეთის მსხვილ სახელმწიფოებშიც.
1985 წლის ივლისში „რაჯნიუპურამში” განახლდა ლექციების კითხვა ჭეშმარიტების მაძიებელთა მრავალათასიანი აუდიტორიის წინაშე.
რაჯნიშმა მიმართა ორიგონის შტატის მმართველობას „რელიგიური მასწავლებლის სტატუსით” ამერიკაში მუდმივად ცხოვრების ნებართვისთვის, მაგრამ უარი მიიღო.
კომუნა განიცდიდა მრავალმხრივ შევიწროებას მმართველი წრეების მხრიდან.
1985 წლის 14 სექტემბერს რაჯნიშის პირადმა მდივანმა და კომუნის რამდენიმე წევრმა მოულოდნელად დატოვა კომუნა და გახმაურდა მათ მიერ ჩადენილი არაკანონიერი ქმედებების მთელი სერიალი, რის გამოც ბჰაგვანმა მოიწვია მართლმსაჯულება საქმის სრული გამოკვლევისათვის. ეს შესაძლებლობა მათ გამოიყენეს კომუნასთან ბრძოლის გასაძლიერებლად. 29 ოქტომბერს რაჯნიში უკანონოდ დააპატიმრეს შესაბამის ორდერის გარეშე და ბრალად წაუყენეს „იმიგრაციის კანონების დარღვევა”. ნოემბრის შუა რიცხვებში ბჰაგვანმა, თავისი დამცველის დაჟინებული თხოვნით, მასზე წაყენებული 34 მეორეხარისხოვანი ბრალდებიდან „იმიგრაციის კანონების დარღვევის შესახებ”, მან თავი დამნაშავედ ცნო მხოლოდ ორ პუნქტში, რათა საკუთარი სიცოცხლე საფრთხისგან ეხსნა ამერიკული მართლმსაჯულების მხრიდან (უწყობდნენ სხვადასხვა სახის თავდასხმებს).
რაჯნიში დააჯარიმეს 400 ათასი დოლარით, თან აიძულეს 5 წლის ვადით დაეტოვებინა შეერთებული შტატები. იგი გაემგზავრა ინდოეთში და გარკვეული პერიოდი ჰიმალაიზე გაატარა. გამგზავრებიდან ორი კვირის თავზე ორეგონის კომუნა დარბეულ იქნა.
მოგვიანებით, პრესკონფერენციაზე, შტატის გენერალურმა პროკურორმა განაცხადა, რომ მმართველობის უმთავრეს მიზანს წარმოადგენდა კომუნის მოსპობა და მხოლოდ ბჰაგვანის მოცილება მისცემდათ საშუალებას მიზნის განსახორციელებლად. ამიტომ, მიუხედავად იმისა, რომ არ ჰქონდათ არანაირი სამხილი რაჯნიშის მიერ ჩადენილი რაიმე სახის დანაშაულისა, იგი დროებით მაინც მოცილებულ იქნა. თუმც მათ არ აწყობდათ ბჰაგვანის დაპატიმრება, რამდენადაც ამით იქმნებოდა საშიშროება, მიმდევრებს იგი ტანჯულ კერპად ექციათ... მიზანი მიღწეულ იყო. რაჯნიშმა დატოვა ამერიკის შეერთებული შტატები.
1987 წლიდან რაჯნიში კვლავ პუნაშია. აშრამში განახლდა 70-იანი წლების ცხოვრების სტილი და კვლავ იწყეს სვლა მისმა მოწაფეებმა.
რაჯნიში გარდაიცვალა 59 წლის ასაკში, 1991 წლის 17 იანვარს, პუნაში.
ამჟამად პუნაში აშრამი კვლავ განაგრძობს მოღვაწეობას. ამავე დროს „რაჯნიშ-ცენტრები” მოქმედებს მთელ მსოფლიოში, ევროპისა და ამერიკის ქვეყნებში, აგრეთვე - არამუსლიმანური აღმოსავლეთის თითქმის ყველა ქვეყანაში.
რაჯნიშის ყოველდღიური ლექციების სერიალი შეკრებილ და გამოცემულ იქნა ასეულობით ტომად ინგლისურ და ინდურ ენებზე.
რაჯნიშის საუბრები ეხება კაცობრიობის ყველა ძირითად რელიგიურ ტრადიციას. იგი არ არის ერთი რომელიმე რელიგიური მოძღვრების მქადაგებელი. როგორც თვითონვე ამბობს, ყველა რელიგია ღმერთისკენ მიმართული სანიშნეა. ადამიანმა თავისი გულის მზერა უნდა მიმართოს მიზნისკენ, რომელსაც ღმერთი წარმოადგენს, და არა სანიშნისკენ.
ოშო რაჯნიში იყო კაცობრიობის ერთ-ერთი იმ ჭეშმარიტ სულიერი მასწავლებელთაგანი, რომელნიც ცდილობდნენ დარღვეულიყო საუკუნეობრივი ზღვარი დასავლურ და აღმოსავლურ აზროვნებას შორის, მომხდარიყო ადამიანის სულიერი და მატერიალური საწყისის სინთეზი და დედამიწაზე ეხილათ გამთლიანებული, სულით ხორცამდე ჯანსაღი ადამიანები.
წინამდებარე წიგნში გადმოცემულია 1974 წლის აგვისტო-სექტემბერში წაკითხული ლექციების სერიალი, რომელსაც რაჯნიშმა „მდოგვის მარცვალი” უწოდა. მის ამოსავალ პუნქტს წარმოადგენს ჩვენს საუკუნეში ნაპოვნი მოციქულ თომას სახარებიდან აღებული იესო ქრისტეს 21 გამონათქვამი. თავის საუბრებში რაჯნიშს სინათლეზე გამოაქვს იესოს გამონათქვამების ეზოთერული (შინაგანი) მხარე და თანამედროვე ადამიანის აზროვნებისთვის გასაგებს ხდის.
„მდოგვის მარცვალი” პირველად გამოდის ქართულ ენაზე. ვფიქრობთ, რომ იგი მრავალ ადამიანს დაუკმაყოფილებს სულიერ წყურვილს და გასცემს პასუხს
ჩუქება
