ბოლო ბარათი ხედავ?! შევწყვიტე გულუბრყვილო დავა სიზმრებთან,
მშრალი სიცხადით იწერება ჩემი წერილი,
არ დამაბრალო დღეს ამბების დრამატიზება,
ეს მონოლოგიც, მოსაწყენი და გაწელილი
იქნება ბოლო, და ყველაზე გულწრფელიც, ალბათ,
არავითარი აჩვილება, თავის მართლება...
ცივია სიტყვა, თუმცა ცრემლში მრავალჯერ დალბა,
რაც იყინება, ის ხომ მერე დიდხანს არ თბება...
როდესაც ცრემლი (ვიცი მალე ესეც დაშრება)
გადმოიღვრება თვალებიდან და გულს მიჩვილებს,
ვიხსენებ, მაშინ – მე რომ შველას ვითხოვდი შენგან,
ჩემი დანგრევით თავი როგორ გადაირჩინე...
ასეთ დროს ყელში მოწოლილი ქვითინი მახრჩობს,
და ცოცხლდებიან აკრძალული სენტიმენტები.
მე მოვდიოდი, ვწრიალებდი შენს სულთან ახლოს,
მისაკარებლად, შესახებად ვერ გიმეტებდი...
ან ვერ ვბედავდი ან არ ვთვლიდი საჭიროდ, სულაც,
მწამდა, სინათლეს ტკივილი რომ წარმოშობს სწორედ...
გხატავდი – ღმერთის ხატებას თუ ხორცშესხმულ სურათს,
გწერდი – სიტყვები გულის კოვზზე ვზომე და ვწონე...
შენ გაუცხოვდი... მიწის შვილად იქეცი უცებ,
შენ გაუცხოვდი... შეგეცვალა ხმაც და აქცენტიც,
გამოებერე მიწას – შავი ვეშაპის მუცელს,
და ვერ ხვდებოდი, დამნაშავედ როგორ მაქცევდი
როცა გეძებდი, გპოულობდი, ისევ გკარგავდი,
სულს გიხუთავდა ახლოს მოსვლის ყველა მცდელობა,
ასეთ დროს ვგრძნობდი, საკუთარ თავს ისე არ ჰგავდი,
თითქოს სხვა ვინმე სასულეში გადაგცდენოდა...
მერე თანდათან მოინდომა გაზრდა მანძილმა,
მერე ნელ-ნელა დაეკარგა სიმართლეს წონა,
უცნობმა ძალამ მიწის მტვერში ისე ამზილა,
ვერც ერთი სიტყვა ვერ წარმოვთქვი მკვეთრად და სწორად.
საკუთარ თავთან დავიბენი და შევკრთი მერე,
ამოვსებული მქონდა პირი მტვრით და ტალახით,
მერე ათასი სისულელე ვჯღაბნე და ვწერე,
გამოვიყენე უღმერთობის ყველა ტალანტი...
დღესაც არ ვიცი, რა სახელი ეწოდოს უნდა
შეგრძნებას, შენს სულს ჩემთვის ასე ხილულს რომ
ხდიდა,
მე მხოლოდ მისი მოკამკამე ნათელი მსურდა,
არავითარი სხვა ნაყოფი, აკრძალულ ხიდან...
დღეს მძიმე ტვირთად მაწევს მხრებზე ყველა ბრალდება,
ხელებში შემრჩა საღებავებშემშრალი ფუნჯი,
მაგრამ რაც სულში იბადება, თურმე არ კვდება
და ამოვსებულს იდუმალი ამბებით ხურჯინს
დავათრევ. დამაქვს არეული დღეების განცდა,
ორივეს ერთად დავატარებ – სასჯელს და შვებას,
და ვხვდები, გულს რაც აალებულ ლექსებად დასცდა,
არ მიდის არსად, მარადიულ ტკივილად რჩება...
სხვა ყველაფერი იკარგება, გვალვებში ხმება...
მენდე, გაუვალ ლაბირინთებს თავი გავართვი,
მე შენი გულის სინათლეს და ტკივილსაც ვხედავ,
ამ სინათლეში დაიწერა ბოლო ბარათი...