ნაწილი პირველი
* * *
ჩემს თავს ისე ვუფრთხილდები
და ვეფერები,
დამყავს სასეირნოდ,
ბაღებში, კონცერტებზე,
კერამიკის და გობელენის გამოფენაზე.
საღამოობით ერთად მივდივართ
მზის ჩასვლისფერი ღრუბლების საყურებლად.
ვასმევ ჩაის, სადილს ვუმზადებ,
ვურეცხავ და ვუუთოებ.
ჩვენ ისე კარგად ვართ ერთმანეთთან,
მშვიდად და თბილად.
ზოგჯერ, ერთმანეთი როცა მოგვბეზრდება,
ვიძინებთ, და სიზმარში ვმღერით.
როცა დანის წვერს მივაბჯენ ყელზე,
მაკრთობს მისი მრგვალი სინატიფე და სიმრთელე,
და ხელი აღარ მიბრუნდება მის დასარღვევად.
ვიცი, მით უფრო ძნელი იქნება ეს სიბერეში:
სუსტი და ნაოჭიანი ყელის გამოჭრა.
ამიტომ ვენდობით ერთმანეთს
და დავცინით კიდეც.
და ისევ ერთად გამოვდივართ სავსე ქუჩაში.
ორივენი შენ დაგეძებთ.
შენში გვინდა ერთმანეთის
შეყვარება
და დავიწყება.