ხანშიშესულ მეძავთა კლუბი ტუკის, ჩემს მეგობარს,
რომელმაც ინგლისური შესანიშნავად იცის
ინგლისური რო მცოდნოდა, კიდე ჰო, მარა არ ვიცოდი და შემეცით თუ გინდათ. ბერძნული მით უმეტეს არ ვიცოდი. საერთოდ, მგონი არაფერი ვიცი წესიერად, აი, ისე, საქმის ცოდნა რო ეთქმოდეს. კვერცხს შევწვავ და ველოსიპედსაც ჯაჭვს გადავაცმევ წვალებით. შეიძლება მეხუთეკლასელ ბავშვს ალგებრის ამოცანის ამოხსნაშიც მივეხმარო, ბაზარი არ არი, მაგრამ ცოდნით არაფერი ვიცი. სამსახურიდან ათენში გამიშვეს, რაღაც ფორუმში მონაწილეობის მისაღებად. დირექტორმა მითხრა, ეკოლოგიურ პრობლემებზეა, მე ვერ მივდივარ და შენ წადიო. ტრაწი დამემართა მომენტალურად. მეთქი, რა საჭიროა, ბატონო ნოდარ, ერთი წელიც მოვიცადოთ, ქმედითი ნაბიჯები გადავდგათ, რამე, რუმე და მომდევნო წელს წავიდეთ-მეთქი. ქვა ააგდო და თავი შეუშვირა. შემოგვთავაზეს და რო არ დავესწროთ, კომპანიისთვის ცუდი იქნებაო. მომავალ წელს ან შემოგვთავაზებენ, ან არაო. ბილეთი ამიღეს და გამომიშვეს. აი, ბავშვებს რო აგზავნიან ხოლმე ზაფხულობით სოფელში ჰაერის გამოსაცვლელად, ისე.
მანამდე ვიღაც ქალმა გამიმწარა სიცოცხლე მეილებით. ლუიზა ერქვა. იმის სახელს რა დამავიწყებს. ჯერ ერთი, ჩემი ფიზკულტურის მასწავლებელს ერქვა ლუიზა და მეორეც, მართლა მაგარი ტვინის ტყვნა ვინმე იყო. "დიარ კონსტანტინ, თუ შეიძლება თქვენი მაღალი ხარისხის ფოტო გამომიგზავნეთ", "დიარ კონსტანტინ, თქვენი ფრენის ზუსტი დრო მომწერეთ", ისა, ესა. მწვალებლებად მოავლინა ღმერთმა ეგეთი ფორუმების ორგანიზატორები. ეგეთებს სახეზე არ უნდა იცნობდე, მხოლოდ ხმით. თან ისეთი ხმა აქვთ მაგ მკვდარძაღლებს, ნაზგულებივით, იმ ფილმში როა, მოკლედ. თან ძაან შორიდან რო მოაქვს გამარჯობა, თითქოს შპროტის წვენში ჩაწობილი პურის ყუა გადაყლაპა და სულზე მიუსწარი. "დიარ კონსტანტინ, თუ შეიძლება ონლაინ რეგისტრაცია გაიარეთ". შემცა, რა. მაცადე ცხოვრება, შე ოჯახდამწვარო. ძაან უგემურად გავუგზავნე ყველაფერი. თან, ერთი თვის დაგვიანებით. ფოტო გავუშვი ისეთი, მკვდარს დააჩხავლებს. კუკუშას ბიჭის ნათლობაშია გადაღებული. ბონდო ძიას ორი ყანწი მაქვს გამოცლილი და გაბიჟვინებული სახით ვუყურებ კამერას. ისეთი გაპროჭილი ვარ, სპილო რო დამატყნან თავზე, ვერაფერს გავიგებ. გერაძეს ჩემს მხარზე ხელი აქვს გადახვეული და თავისი ზნამენიტი სამაჯური უბრწყინავს, "უფალო შეგვიწყალენ" აწერია ძაან დიდი მორწმუნესავით, მარა თვითონ გერაძე არ ჩანს. თან თვალები წითლად მინათებს. ეგრე შვრებოდნენ ხოლმე ძველი აპარატები – კოდაკები რო იყო. თავიბოლო ოცი ლარი ღირდა მგონი. ყველას წითელი თვალები გამოგვდიოდა. ეს ფოტო რაღაც ნავაროჩენნი აპარატით გადამიღეს, მარა რატომღაც აქაც წითელი თვალები მაქვს. ცოტა კი ვიდარდე, მეთქი, თეფშზე რო ჯონჯოლის ნარჩენები და კუდუსუნზე საცოდავად ამოსული ბეწვივით ქინძი გდია, ის მაინც მომეჭრა. მარა რაც არი, არი. ეყოფა ლუიზას, მაგაზეც მადლობა თქვას. ეს ფოტოშოპიც არ ვიცი. არაფერი არ ვიცი მგონი, მართლა. ეს ინგლისური რაღა გახდა, ისწავლე, შე დალოცვილისშვილო, რა.
თბილისში ხო ეგრეა. სივიში ინგლისურის გვერდით ყველა ფლუენტს წერს. ჩემი თაობის ტიპებზე ვამბობ. არადა, ამ ქალაქში სხვის საქმეში ცხვირის ჩაყოფის გარდა არავინ არაფერი იცის. ჰო, ტრაკის ქიცინიც იციან, ისე. ტრაკის ქიცინი და ტელევიზორში ბრტყელ-ბრტყელების ლაპარაკი. "სეკულარულ სახელმწიფოს ასე ვერ ავაშენებთ", "მთლიანი შიდა პროდუქტი", "პრეზიდენტის ინსტიტუტი უნდა გაძლიერდეს", ტრალი, ვალი. ვის აბოლებენ ეგენი. არაფერი იციან, საერთოდ.
მეც არაფერი ვიცი. ამ სამსახურში მამაჩემის ბლატებით მოვხვდი. გრანტებს ვიძლევით იმ ქარხნებზე, ვინც მზის ენერგიის გამოყენებას დაიწყებს წარმოებაში. პიარშიკი ვარ, რა. არადა, მაღლივი დავამთავრე. კი არ დავამთავრე, ოთხწლიანი სასჯელი მოვიხადე. სწავლა არ იყო რთული. რთული კი არა, საერთოდ არ იყო, მარა მისადგომადაა ჯოჯოხეთი ეგ დასაწვავი შენობა. საჭმლის პონტშიც მურტალია. ქავთარაძისკენ თუ ჩაიჩოჩებ და ფენოვანს გაძიძგნი. კოკა-კოლასაც ჩააყოლებ, მამენტ.
სივიში ინგლისურის გვერდით მეც ფლუენტ მიწერია. არ ვიცი ეს ფლუენტ რას ნიშნავს, მარა ჭრის, ფაქტია. არა, ბიჭო! აქ ყლე არავინ არ არი. სიტყვების მარაგი არ მაქვს საერთოდ. მარა, გამოთქმა მაქვს მაგარი. მა-გა-რი. კინოებიდან ნასწავლი, რა, რუსულ თარგმანს შორის ყურმოკრული და ტვინში დალექილი. დაჟე რამდენიმე ფრაზა მაქვს დაზეპირებული ყოველი შემთხვევისთვის, ძალიან ისეთი რო არ გამოვჩნდე, როგორიც სინამდვილეში ვარ. "ითს ე გრეით ფლეჟა თუ მით იუ არლი მორნინ". გ-ს აღარ ვაყოლებ. ასე უფრო თესლია. ამას ისე ვამბობ, შეიძლება დაბურძგლოს კაცს. ნაღდი შოტლანდიელივით. ოღონდ, დილა რო არ იყოს და საღამოს მაცნობდნენ ვინმეს, მაინც "მორნინს" ვიძახი. კი ვიცი, რო საღამო "ივნინგ" არი, მარა ჯერ ერთი, "მორნინ" უფრო სითესლეა და მეორეც, ამდენი წლის ნაშენები სისტემის მორღვევა არ მინდა. გადაალაგე, გადმოალაგე. პრონანსიც აღარ იქნება ისეთი, დუბლინელი განგსტერის საკადრისი. მარა ყოველთვის ვერ