ჟურნალისტი, რომელიც აშუქებდა აფხაზეთის ომს, ომის შემდეგ ცდილობს, კვლავ მოხვდეს აფხაზეთში. 21 წლის შემდეგ იგი ახერხებს, გადავიდეს ოკუპირებულ ტერიტორიაზე. ხუთდღიანი მოგზაურობის დროს შემოივლის გალის, ოჩამჩირის, ტყვარჩელის, გულრიფშის სოფლებს. სოხუმს, გუდაუთას, გაგრას. შეხვდება აფხაზებს.ისმენს მათ მოსაზრებებს. დადის გავერანებულ, გაპარტახებულ და უკაცრიელ ადგილებში, იღებს ფოტოებს, ხოლო საღამოს, მძიმე შთაბეჭდილებების ქვეშ მყოფი, წერს დღიურებს, სადაც იგი დაწვრილებით აღწერს ნანახს და გაგონილს. ომის ჟურნალისტი ხვდება იმ აფხაზებსაც, რომლებიც აფხაზეთის ომში ქართველების წინააღმდეგ იბრძოდნენ. დღეს მათ ქართველები ენატრებათ, ისევე, როგორც ქართველებს ენატრებათ აფხაზები. ნაწარმოებს ლაიტმოტივად მიჰყვება აზრი: "რაც მტრობას დაუნგრევია, სიყვარულს უშენებია".