წინათქმა
წინამდებარე კრებული წარმოადგენს აკაკი წერეთლის სახელმწიფო უნივერსიტეტისა და ქარჩხაძის გამომცემლობის ერთობლივ პროექტს, რომლის მიზანია ქართულ სააზროვნო სივრცეში, პირველ რიგში _ მწერლობაში დასმული და გააზრებული ისეთი ფუნდამენტური საკითხების კვლევა და გადააზრება, როგორებიცაა თავისუფლება, სახელმწიფოებრიობა, რელიგიურობა, ადამიანის ბუნება, კულტურულ სამყაროსთან მისი მიმართება და სხვ. ამასთან განსაზღვრულია: როგორც ეს, ისე შემდგომი სხვა კრებულები, მიძღვნილ იქნეს ზემოთ ჩამოთვლილი ცალკეული თემებისა და სხვადასხვა ქართველი ავტორებისადმი.
ამ შემთხვევაში, ეს კრებული ეძღვნება მეოცე საუკუნის მეორე ნახევრის ერთ-ერთ ყველაზე ღრმად მოაზროვნე მწერალს, ჯემალ ქარჩხაძეს. კრებულში წარმოდგენილი სტატიები წაკითხულ იქნა ქუთაისში, აკაკი წერეთლის სახელმწიფო უნივერსიტეტში ქარჩხაძის შემოქმედებისადმი მიძღვნილ კონფერენციაზე და შეეხება აზროვნების სხვადასხვა ასპექტს _ ფილოსოფიურს, ლიტერატურულს, სოციალ-თეორიულს, გარკვეულწილად, პოლიტიკურს, კულტურ-მეცნიერულს და ა.შ. ნაშრომებში განხილულია ადამიანის სამყაროსთან მიმართების, სამყაროში მარტოდ დარჩენის, მისი სამყაროში ჩავარდნილობის, ზნეობრივი პრინციპების, პოლიტიკური შეხედულებების საკითხები და, იმავდროულად, წარმოდგენილია მწერლის ლიტერატურული ნაღვაწის სხვადასხვა ჟანრები და ასპექტები, როგორიცაა, მაგალითად, ქარჩხაძის დამოკიდებულება ზღაპართან, ისტორიულობასთან და ა.შ.
გამომცემლები ვიმედოვნებთ, რომ ეს კრებული გასცდება აკადემიურ სივრცეს და საინტერესო იქნება საზოგადოების სხვადასხვა ჯგუფებისათვის, რომლებიც დაინტერესებულნი არიან ზოგადსაკაცობრიო ღირებულებების, ეროვნული თავისებურებების გააზრებითა და გაშინაგანებით.
პროექტის მხარდაჭერისათვის განსაკუთრებული მადლობა გვინდა გადავუხადოთ აკაკი წერეთლის სახელმწიფო უნივერსიტეტის რექტორს, გიორგი ღავთაძეს, და ასევე, კონფერენციაში მონაწილეებს, რომლებმაც წარმოადგინეს მაღალკვალიფიციური ნაშრომები. იმედია, რომ ამგვარი თანამშრომლობა სამომავლოდაც პროდუქტიულად გაგრძელდება.
რედაქტორებისგან
ქუთაისი-თბილისი,
2018 წლის მაისი