„საქართველოს მგოსნებს, ყველა მეოცნებეს, ქართველ ხალხს! ... საქართველოს ლანდურ არსებას მოვევლინეთ ჩვენ ახალი სხივმოსილობით და ოცნება დაკარგულ ხალხს ვასწავლით განწმენდილ გზას მომავლის ცისფერ ტაძრისაკენ.“ 1916 წელს, ქუთაისში ქართველ სიმბოლისტ პოეტთა და პროზაიკოსთა ჯგუფმა ლიტერატურული ჟურნალი - „ცისფერი ყანწები“ გამოსცა. ჯამში ჟურნალის მხოლოდ ორი - გაზაფხულისა და ზამთრის ნომრები გამოვიდა. „ვინ არის დამნაშავე, რომ ქართული მწერლობა ისე გაასაჭურისეს, რომ პორნოგრაფიად ითვლებიან გრ. რობაქიძის და ელენე დარიანის ლექსები. ვინ არი დამნაშავე, რომ „ყანწების“ შეჩვენებას ბედავს კაცი, რომელმაც პირველად გაბედა რუსთაველისთვის დაეყეფა და რომელის სახელს ხშირად ამბობენ მეორე ტრაგიულად აღსრულებული მწერალის ხსენებაზე... ვინ არი დამნაშავე, რომ გათამამებული სირაჯები დღეს რყვიან ქართულ პოეზიას?“ „ცისფერ ყანწებში“ დაიბეჭდა გრიგოლ რობაქიძის, იოსებ გრიშაშვილის, გალაკტიონ ტაბიძის (მთაწმინდის მთვარე, ლურჯა ცხენები), ელენე დარიანის, ივანე ყიფიანის, ვალერიან გაფრინდაშვილის, პაოლო იაშვილის, კოლაუ ნადირაძის, გრიგოლ ჯაფარიძის, ლელი ჯაფარიძისა და არისტო ჭუმბაძის ლექსები, ასევე ნიკო ლორთქიფანიძისა და სანდრო ციკერიძის მინიატურები. ჟურნალის ყდის ავტორია ლადო ჯაფარიძე. ამ გამოცემით ქართველ სიმბოლისტთა გაერთიანებამ თვითდამკვიდრება დაიწყო.