"მკითხველის წინაშე ქეთი ბეროშვილის კიდევ ერთი წიგნია - "ცხოვრებისგან გარიყულები", რომელიც ჩვენი უახლესი წარსულის პოლიტიკური კატაკლიზმების და ბოლო დროს რეალობაში გამეფებული მოუგვარებელი პრობლემების გამოძახილია. დიახ, წაიკითხეთ და დამეთანხმებით, მსგავსი ისტორიები, სამწუხაროდ, ხშირად ხდება. დამოუკიდებლობის მშენებლობის გზაზე მდგარი სახელმწიფოს შენება არ გამოდგა ადვილი. თითქმის ორი ათეული წელია ვებრძვით ჩვენს გარშემო გამეფებულ უმუშევრობას, სიღატაკეს, სოციალურად დაუცველთა მომრავლებას, უსამართლობას... სწორედ ერთ-ერთი ასეთი ოჯახის ტრაგედიის ფონზე იშლება ერთი ახალგაზრდა ყმაწვილის ცხოვრება, რომელსაც მის გარშემო დატრიალებული განუკითხაობა და უსამართლობა დაუნდობელ, შურისმაძიებელ დამნაშავედ აქცევს." - მანანა გორგიშვილი