შავი ზღვის სანაპიროებიდან თითქმის ყველა მამაკაცი წავიდა აზიაში საომრად. ძველ ადგილას სოფლებში დარჩნენ მხოლოდ მოხუცი მამაკაცები, პატარა ბავშვები და დედაკაცები. უკაცო ქვეყანაში დედაკაცებს უხდებოდათ ყველაფრის გაკეთება, რასაც წინად მამაკაცები აკეთებდნენ. ... შიმშილმა მიაღწია უკანასკნელ საფეხურამდე - ამდენის ატანა ვეღარ შეძლეს და მიიღეს ქალებმა საშინელი გადაწყვეტილება - ერთ ღამეს გაიყვანეს ყველა მოხუცები და ბავშვები და გადაყარეს ზღვაში. ტომირანდა, წინამძღოლის ცოლი არ ჰგავდა სხვა ქალებს. ის დაბადებული იყო გრიგალისა და ქარიშხალისათვის. მას ეჯავრებოდა მყუდრო ცხოვრება და მშვიდი ამინდი - მისთვის დღესასწაული იყო იარაღის ხმაურობა და ბუნების ქარიშხალი. ასე იწყება ამბავი ამორძალების სამეფოს - ტელისკირის დაარსებისა და მათი დედოფლის, გრიგალისა და ქარიშხლისათვის დაბადებული - ტომირანდასი, ვისთვისაც დღესასწაული იყო იარაღის ხმაურობა და ბუნების ქარიშხალი.