რედაქტორისგან

ვფიქრობთ, ქვემორე წიგნი ქართულ ენაზე არსებულ მსგავსი დანიშნულების მქონე გამოცემათა შორის ერთ-ერთი საუკეთესო იქნება თავისი მრავლისმომცველობითა და სიღრმით და კეთილ სამსახურს გაუწევს ჭეშმარიტების მოყვარე და მაძიებელ ყველა ადამიანს. მე, როგორც ერთ-ერთ რედაქტორს, მხოლოდ წიგნის დამუშავების უკანასკნელ ეტაპზე მომიწია მასთან შეხება და სხვებთან ერთად მცირე წვლილი მეც შევიტანე მისი იმ სახით ჩამოყალიბებაში, რომლითაც მას მკითხველი იხილავს. მრავალი შენიშვნის მიუხედავად, რომელიც წიგნთან დაკავშირებით შეიძლება ჩნდებოდეს დროის მოთხოვნებისა და ტენდენციების შესაბამისად, ვფიქრობთ, იგი მაინც ყველაზე მთავარზე, მარადიულ საღვთო ფასეულობებზეა ორიენტირებული და ღირსეულად გაამართლებს თავის დანიშნულებას.

წინასწარ წარმატებას ვუსურვებთ სახარებისეული მარგალიტის დარად ცხონებისა და ღვთის წინაშე გამართლების მაძიებელ თითოეულ მკითხველს.

ქრისტესმიერი სიყვარულითა და კეთილი სურვილებით დეკანოზი არჩილ ხაჩიძე.

წინასიტყვაობა

წინამდებარე წიგნი არის სულიერი ცხოვრებით დაინტერესებული იმ ადამიანებისათვის განკუთვნილი, რომელთაც ღვთისკენ სავალ გზაზე შედგეს ფეხი.

უპირველეს ყოვლისა, მადლობა უფალს ჩვენდამი უზომო მოწყალებისათვის, რომელსაც იგი უხვად ანიჭებს ყველას, ვინც ცხონების ამ გზას შეუდგება. და ამ წიგნის შედგენაც, სწორედ რომ ერთ-ერთი ამ მოწყალებათაგანია ჩვენთვის მომადლებული არა მარტო ჩვენი სულის გასაძლიერებლად, არამედ ღვთისმაძიებელი ადამიანის ხელის გასაწვდენად და დასახმარებლად.

როგორც კი პირველ ნაბიჯს გადადგამს ადამიანი, ცდილობს მეორეც გადადგას, შემდეგ მესამე და ა.შ. უფლის გზაც, სწორედ ასეთი ზეაღსვლაა - ერთ კითხვას მეორე მოჰყვება, მეორეს მესამე და ასე დაუსრულებლად.

ჩვენც სწორედ ასეთი პატარა ნაბიჯებით და კითხვებით დავიწყეთ და წიგნის შექმნის იდეაც იქვე დაიბადა - ჩვენი მსგავსი ახალფეხადგმულებიც ხომ მრავლადაა მსგავსი კითხვებით.

ყოველი ადამიანი, რომელიც ღმერთის არსებობას ირწმუნებს, პირველ რიგში ქრისტიანული ეკლესიის სწავლების საფუძვლებს უნდა გაეცნოს და სწორად ესმოდეს ისინი, უნდა ცდილობდეს, რომ ამ სწავლების მიხედვით იცხოვროს, და როდესაც უფალი ამ კითხვებზე პასუხის მიღების გულმხურვალე სურვილს იხილავს, აუცილებლად დაეხმარება ადამიანს, საშუალებას მისცემს შეიმეცნოს ჭეშმარიტება და შეკავშირდეს ქრისტესთან, რომელიც თავად არის "გზა, ჭეშმარიტება და სიცოცხლე" (იხ. იოან. 14, 6).

ამ კითვებზე პასუხების ძებნაში შეიქმნა წიგნის პირველსახეც, რომელიც თითქმის შედგენილი მასალებით შევკრიბეთ, სულ რამდენიმე ათეულ წიგნად ავკინძეთ და ახლობლებს დავურიგეთ. სწორედ მათმა დიდმა ინტერესმა და მოწონებამ განაპირობა გვეფიქრა ამ მეორე გაბედული ნაბიჯის გადადგმაზე, რომლის შედეგსაც უკვე თქვენც გთავაზობთ. ამასთან, აღვნიშნავთ, რომ მასში განხილული საკითხებისა და თემების ღრმა ანალიზის პრეტენზია ნამდვილად არ გვაქვს, ვინაიდან, როგორც უკვე აღვნიშნეთ, წიგნი განკუთვნილია სულიერი ცხოვრების დაწყებით დაინტერესებული ადამიანებისათვის, თუმცა მასში გამოყენებული ლიტერატურის ავტორები ძველი და ახალი ეპოქის ცნობილი მამები, წმინდანები - სასულიერო დასის წევრები თუ საერო პირნი არიან.

ამისთვის, სხვადასხვა წიგნში გაბნეული შედარებით გასაგები ენით შედგენილი საკითხები შევეცადეთ შეგვეკრიბა, დაგვეტვირთა მაქსიმალური ინფორმაციით და შეძლებისდაგვარად შევსებული სახით მოგვეწოდებინა თქვენთვის.

ეს იყო ჩვენთვის რთული და ამავე დროს სასიამოვნო გზა, რომელსაც ნამდვილად ვერ გავივლიდით ღვთის შეწევნის გარეშე და ამავე დროს იმ ადამიანების უანგარო დახმარების გარეშეც, რომლებმაც დიდი თანადგომა და დახმარება გაგვიწიეს.

გარდა რუსული გამოცემისა - "საღვთო რჯული", წიგნის ერთ-ერთ მთავარ წყაროდ შეიძლება ჩაითვალოს ვებ-გვერდ – www.orthodoxy.ge-ზე შეკრებილი მასალები, რომელნიც იქცა კიდეც მისი შექმნის შთაგონებად. ასევე დიდი მადლიერება გვინდა გამოვხატოთ გაწეული დახმარებისათვის ყოფილი გამომცემლობა "ლაზარეს" წევრთა მიმართ, რომელნიც წიგნის შედგენის პერიოდში კეთილი რჩევებით დაუზარებლად გვედგნენ გვერდში (მათ შორის, აღსანიშნავია წიგნის ერთ-ერთი კონსულტანტი ბნ-ი ვლადიმერ ჩხიკვაძე). ტექნიკურ მხარეზე დიდი ენთუზიაზმით იმუშავა ქნ-მა ნინო ყაველაშვილმა. შეუძლებელია არ აღინიშნოს ქნ. ნანა ჩაჩიბაიას მიერ ტექსტის კორექტირებისათვის შესრულებული დიდი სამუშაო. წიგნის უმეტესი ნაწილი რუსული მასალებიდანაა შედგენილი, რომელთა თარგმნისათვის უშურველად და დიდი გულმოდგინებით გაისარჯა ბნ-ი ვასილ ბურკაძე. აღსანიშნავია წიგნის რედაქტორის დეკანოზ არჩილ ხაჩიძის მიერ გაწეული ფასდაუდებელი შრომა, რომელიც დიდად დაგვეხმარა წიგნის საბოლოო სახით ჩამოყალიბებაში. ჩვენის მხრივ, სასიამოვნო მოვალეობად ვთვლით, დიდი მადლიერებით მოვიხსენიოთ: წიგნის ერთ-ერთი რედაქტორი დეკანოზი იოანე მამნიაშვილი, რომელმაც ლიტურგიკულ ნაწილზე იმუშავა; კონსულტანტები - მღვდელმონაზონი მიქაელი და ქნ-ი მაკა გოცირიძე, რომლებმაც მნიშვნელოვანი დახმარება გაგვიწიეს მეტად სპეციფიური - ბერძნული, ლათინური და ებრაული ტერმინების განმარტებაში; ქნ-ი ლელა ბოჭორიშვილი ყდის დიზაინზე მუშაობისათვის და სოფიკო  ტარყაშვილი წიგნის ორნამენტებით გაწყობისათვის; მხატვარი გია ხუბუა ზედმიწევნით შესრულებული სამუშაოებისათვის; ბნ-ი დავით ბითაძე წიგნში არსებული ტაძრების ფასადებისა და გეგმების დამუშავებისათვის; ასევე ბნ-ი ბესარიონ გუგუშვილი ფონტების მოწოდებისათვის. და საერთოდ, მადლობა ყველას, ვინც თუნდაც ერთი სიტყვით შეგვეწია ამ საშურ საქმეში.

რა თქმა უნდა, ჩვენი ნაშრომიც არ არის დაზღვეული გარკვეული ხარვეზებისაგან და ამიტომ ნებისმიერი ნაკლის აღმოჩენის შემთხვევაში მკითხველს შენდობას ვთხოვთ და მადლიერებით მივიღებთ ნებისმიერ დასაბუთებულ შენიშვნას, რათა წიგნის მომდევნო გამოცემებში მოხერხდეს მათი გათვალისწინება (შენიშვნები შეგიძლიათ გამოგვიგზავნოთ შემდეგ მისამართზე: www.facebook.com/EklesiisSaunje/).

დიდი იმედი გვაქვს, რომ ჩვენი ეს მოკრძალებული ნაშრომი კეთილ სამსახურს გაუწევს ყველა ღვთისმოყვარე და მოშურნე ადამიანს და შეეწევა სულიერ აღმასვლაში.

ღმერთმა ამრავლოს რწმენასა და ცოდნაში გაძლიერებული მართლმადიდებელი მრევლი. "...გამოიძიეთ ღმერთი და ცხოვნდეს სული თქუენი" (ფსალმ. 68, 33).