თბილისი მხოლოდ ქალაქი არ არის, ის ლიტერატურული ტოპოსია, გმირი, პერსონაჟი, სივრცე, ფონი, მომსწრე, მხილველი, მოქმედი... ზაალ სამადაშვილის ახალი წიგნი „ურბანული ბალადები“, ერთგვარად, თბილისის ბიოგრაფიაა, აქ ქალაქი ავტორიცაა, რომელიც მწერალთან ერთად წერს და მოგვითხრობს თავისსავე ისტორიას. როგორია თბილისი სხვადასხვა დროში, სხვადასხვა ადამიანის ცხოვრებაში, სხვადასხვა თვალდახედვიდან... იუნკერი ერისთავი, არდონის ქუჩის პური, ოცდამესამე სკოლა, ცივი სადგური და პაემანი პროსპექტზე, კინოში წასვლა, მდინარე, წაგებული ომი, მუშტაედის ორკესტრი... ხმები, ადამიანები, მეხსიერება და ქალაქი, რომელიც სუბიექტიცაა და ობიექტიც, მოქმედების ადგილიც და მოქმედი პირიც, სცენაც და პარტერიც...